ឧត្ដមសេនីយ៍ឯក ហ៊ុន ម៉ាណែត អញ្ជើញបើកសម្ពោធរោងចក្រដំឡើងរថយន្ត Ford តម្លៃ២១លានដុល្លារនៅ ពោធិ៍សាត់!

កាលពីព្រឹកមិញថ្ងៃទី១៦ ខែមិថុនា ឆ្នាំ២០២២ ឯកឧត្ដម ឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក តំណាងដ៏ខ្ពង់ខ្ពស់សម្ដេចតេជោ ហ៊ុន សែន បានអញ្ជើញបើកសម្ពោធជាផ្លូវការរោងចក្រដំឡើងរថយន្ត Ford លើកដំបូងក្នុងប្រទេស កម្ពុជា ដែលមានតម្លៃ ២១លានដុល្លារ។

រោចក្រដំឡើងរថយន្ដ Ford នេះមានទីតាំងស្ថិតនៅក្នុងតំបន់សេដ្ឋកិច្ចពិសេស ស្រុកក្រគរ ខេត្ដពោធិ៍សាត់នៅលើផ្ទៃដីសាងសង់ ៤ហិកតា ដែលនៅក្នុងឆ្នាំដំបូងនេះ ក្រុមហ៊ុន​គ្រោង​នឹង​ដំឡើង​រថយន្ត​សរុប​ចំនួន​ ​៤​,​៥​០​០​ ​គ្រឿង​ ​ដើម្បី​បំពេញ​តម្រូវ​ការ​ទី​ផ្សារ​តែ​ក្នុង​ប្រទេស​កម្ពុជា​។​

តាមការវាយតម្លៃរបស់ថ្នាក់ដឹកនាំក្រុមហ៊ុន រោងចក្រនេះ បន្ទាប់ពីដាក់ឲ្យដំណើរការហើយ តម្លៃរថយន្ត Ford ដែលដំឡើងនៅកម្ពុជា​អាចនឹងមាន​ភាពល្អប្រសើរជាងរថយន្តនាំចូល ប្រសិនបើមានការជួយសម្រប សម្រួល និងជួយជ្រោមជ្រែងពីរាជរដ្ឋាភិបាល។ រថយន្តប្រភេទ ​Ford​ ​Ranger​ ​និង​ ​Ford​ ​Ever​e​s​t​ គឺជាកោលដៅដំបូងនៃការផលិតរបស់រោងចក្រ ព្រោះតែវាជាតម្រូវការខ្ពស់សម្រាប់ទីផ្សារនាពេលបច្ចុប្បន្ន។

​សូមបញ្ចាក់ថារោងចក្រដំឡើងរថយន្ត​ ​Ford​ បានបើកសម្ពោធជាផ្លូវការព្រឹកមិញនេះ គឺ​សាងសង់​លើ​ផ្ទៃដី​ជាង​៤​ហិកតា​ ​នៅ​ភូមិ​សា​វ័ន​ ​ឃុំ​ស្នា​អន្សា​ ​ស្រុក​ក្រគរ​ ​ខេត្ត​ពោធិ៍សាត់​ ​​។​ ​រោងចក្រ​នេះ​ផ្គុំ​ ​និង​ដំឡើង​រថយន្ត​ ​Ford​ ​Ranger​ ​និង​ ​Ford​ ​Ever​e​s​t​ ​ដោយ​ក្រុមហ៊ុន​ R​MA​ ​AUTO​MOTIVE​ (​CAM​BO​D​I​A​) ​CO​.,​L​T​D​ ​។​ រោងចក្រ​នេះ ក៏​នឹង​ជួយ​បង្កើត​ការងារ​រហូតដល់​ ​៥​០​០​កន្លែង​ ​សម្រាប់​ខ្សែ​ផលិតកម្ម​៕