ជប៉ុន ក៏ដូចជាប្រទេសដទៃទៀតដែរនៅក្នុងពិភពលោក គឺកំពុងទទួលរងឥទ្ធិពលកម្ដៅក្ដៅខ្លាំងក្នុងរដូវក្ដៅនេះ ដោយទាំងមនុស្ស និងសត្វចិញ្ចឹមសុទ្ធតែទទួលរងឥទ្ធិពលដូចគ្នា។
ដើម្បីជួយកាត់បន្ថយដល់សត្វឆ្កែ ក្រុមហ៊ុនសំលៀកបំពាក់មួយនៅទីក្រុងតូក្យូ ជាមួយពេទ្យសត្វ បានសហការគ្នាបង្កើតកង្ហារពិសេសសម្រាប់សត្វឆ្កែ និងអាចប្រើជាមួយសត្វឆ្មាបានផងដែរ។
កង្ហារដែលដំណើរការដោយថ្ម និងមានទម្ងន់ ៨០ក្រាម បានដេរភ្ជាប់ជាមួយឈុតសំលៀកបំពាក់ដ៏ពិសេស ដែលអាចបាញ់ខ្យល់ត្រជាក់ជួយកាត់បន្ថយកម្ដៅជុំវិញខ្លួនរបស់សត្វបាន។ ឈុតនេះមានចែកចេញជាប្រាំទំហំផ្សេងគ្នា និងមានតម្លៃប្រមាណ ៧៤ដុល្លារ។
ប្រធាននៃក្រុមហ៊ុនសំលៀកបំពាក់ Sweet Mommy (ស្វីត មាំមី) ដែលបង្កើតចេញឈុតពិសេសនេះ បានលើកឡើងថាដើមហេតុនាំឲ្យមានការបង្កើតឈុតនេះគឺក្រោយពីកញ្ញាឃើញថាសត្វចិញ្ចឹមរបស់ខ្លួនតែងអស់កម្លាំងខ្លាំងរាល់ពេលដែលចេញដើរនៅក្រោមកម្ដៅថ្ងៃក្ដៅ។
កញ្ញា Rei Uzawa (រី អ៊ូហ្សាវ៉ា) ទទួលបានគំនិតនៃការបង្កើតឈុតនេះពីឈុតត្រជាក់សម្រាប់មនុស្សដែលឧស្សាហ៍ប្រើប្រាស់ដោយអ្នកធ្វើការសំណង់ និងអ្នកប្រើកម្លាំងពលកម្មដទៃទៀតដែលត្រូវធ្វើការហាលថ្ងៃ។
គួរដឹងថាឈុតពិសេសនេះ បានចេញលក់កាលពីដើមខែកក្កដា ហើយក្រុមហ៊ុន Sweet Mommy (ស្វីត មាំមី) បានទទួលការកុម្ម៉ង់ទិញប្រមាណ ១០០សម្រាប់ សម្រាប់ឈុតពិសេសនេះ៕
