ថ្លែងក្នុងសន្និសីទសារព័ត៍មានរៀបចំឡើងដោយក្រសួងបរិស្ថាន និងអង្គការសង្គមស៉ីវិល នៅខេត្តកំពង់ធំ កាលពីពេលថ្មីៗតារាចម្រៀងល្បីឈ្មោះអ្ននាង មាស សុខ សោភា បានលើកឡើងថា អ្វីដែលអ្នកនាងខ្លាចបំផុតគឺការបាត់បង់ព្រៃឈើ សត្វព្រៃ និងធនធានធម្មជាតិ ដែលជាជំរកដ៏សំខាន់បំផុតសម្រាប់មនុស្ស សត្វនិងរុក្ខជាតិ ដែលជាកត្តាសំខាន់បំផុតធ្វើឱ្យអ្នកនាងបោះជំហានមកាន់យុទ្ធនាការ អន្ទាក់សូន្យ ជាមួយក្រសួងបរិស្ថាន។
តារាចម្រៀងប្រចាំផលិតកម្ម រាម បានបញ្ជាក់ថា៖«ចឹងនៅពេលដែលខ្ញុំយល់ច្បាស់ពីផ្នែកអស់ទាំងនេះ គឺ ខ្ញុំកាន់តែចង់បង្ហាញទៅ ដល់អ្នកគាំទ្ររបស់ខ្ញុំយ៉ាងពេញ ទំហឹង ឱ្យការចាប់អារម្មណ៍គឺរឿងសព្វបែបសព្វយ៉ាងមកនៅក្នុងបច្ចុប្បន្ននេះ ឥលូវនេះ កើតឡើងនូវរឿងប្លែកៗព្រោះតែយើងបានបំផ្លាញធម្មជាតិ និងសត្វព្រៃ។ ខ្ញុំ ឃើញចឹង បានជាខ្ញុំចេះតែចង់ប្រាប់ថា យើងគួរតែយកចិត្តទុកដាក់ខ្លាំងឡើងបន្ថែមទៀត ដោយសារ យើងនឹងប្រឈមមុខជួបអ្វីមួយហើយ»។
អតីតតារាចម្រៀងរបស់ផលិតកម្ម ថោន បានបន្តថា ព្រៃឈើ សត្វព្រៃនិងជីវៈចម្រុះ ដែលជាធនធានធម្មជាតិ គឺជាអ្វីគ្រប់យ៉ាងដែលសំខាន់ដែលចាំបាច់ចូលរួមការពារ និងថែរក្សាឱ្យបានគង់វង្ស។ក្នុងនោះអ្នកនាង ក៏បានប្ដេជ្ញាចូលរួមការពារធនធានធម្មជាតិ តាមរយះការផ្សព្វផ្សាយសារអប់រំក្នុងបទចម្រៀងជាបន្ដ ក៏ដូចជា ជំរុញដល់អ្នកគាំទ្រថ្មីៗរបស់ខ្លួនចូលរួមស្រលាញ់ និងថែរក្សាធនធានធម្មជាតិផងដែរ។
ដោយឡែក ឯកឧត្ដម នេត្រ ភក្រ្ដា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានបង្ហាញក្ដីមោទនភាពចំពោះ មាស សុខសោភា ដែលជាតារាចម្រៀងប៉ុន្ដែបានចាប់អារម្មណ៍ និងចូលរួមថែរក្សាធនធានធម្មជាតិនៅកម្ពុជា ដែលចាត់ទុកជាការចូលរួមចំណែកយ៉ាងសំខាន់ជាមួយរាជរដ្ឋាភិបាល។
ឯកឧត្ដម នេត្រ ភក្រ្ដា បន្តថាការមើលឃើញប្រកបដោយមោទនភាពយើងឃើញថា ការដឹកនាំរបស់ ក្រសួងបរិស្ថាន ដោយមានការចូលរួមគាំ ទ្រពីអង្គការដៃគូ ហើយថ្ងៃនេះយើងមានសិល្បការិនីម្នាក់ ដែលពោរពេញ ទៅដោយការគាំទ្រពីប្រជាពលរដ្ឋ និងការទទួលស្គាល់ពីប្រជាពលរដ្ឋនេះយើងជឿថា នឹងមានឥទ្ធិពល ទៅលើការផ្លាស់ប្ដូរផ្នត់គំនិតរបស់ប្រជាពលរដ្ឋ យ៉ាងហោចក៏គាត់បានទទួលសារនេះ ទៅពិចារណាថាកុំហូបសាច់សត្វ ហើយអ្វីដែលយើងធ្វើទាំងអស់នេះ គឺដើម្បីពួកគាត់ទាំងអស់គ្នាទេ ។
ឯកឧត្ដមជឿជាក់ថា ការចូលរួមគឺជាចំណុចសំខាន់ ហើយសូមអំពាវ នាវទៅឱ្យសិល្បករ សិល្បការិនីផ្សេងៗទៀត អ្នកដែលមានឥទ្ធិពលនៅក្នុងសង្គម លើបណ្ដាញព័ត៌មាន សង្គមផ្សេងៗទៀតអញ្ជើញចូលរួមជាមួយក្រសួងបរិស្ថាន ដើម្បីយើងធ្វើការងារ ការពារសត្វព្រៃ និងព្រៃឈើ ពីព្រោះអ្វីដែលយើងខិតខំប្រឹងប្រែង គឺដើម្បីបុព្វហេតុរួមតែមួយ គឺបរិស្ថាន នឹងធនធានធម្មជាតិ ដើម្បីឱ្យគង់វង្សនេះឯង។
យោងការតាមការគូសបញ្ជាក់ពី ឯកឧត្ដម នេត្រ ភក្រ្ដា បទល្មើសព្រៃឈើ និងសត្វព្រៃក្នុងនៅក្នុងតំបន់ការពារធនធានធម្មជាតិនៅកម្ពុជា ត្រូវបានរកឃើញ និងចាប់បានជាបន្ដបន្ទាប់។ ដោយឡែក ក្នុងឆ្នាំ២០២១ អន្ទាក់ ប្រមាណ ៦ម៉ឺនអន្ទាក់ ត្រូវបានមន្រ្ដីអភិរក្សសត្វព្រៃដោះចេញ ដែលការដោះចេញនេះ បានចូលរួមកាត់បន្ថយអត្រាបាត់បង់សត្វនៅកម្ពុជាមួយចំណែកផងដែរ៕