អ្នកម្ដាយមានកូនតូចត្រូវប្រុងប្រយ័ត្នខ្ពស់! ក្រសួងរកឃើញម្សៅលាបខ្លួនទារកនិងកុមារ ១២ប្រភេទអាចបង្កជំងឺមហារីក

ក្រសួងបានប្រកាសពីការរកឃើញ ម្សៅលាបខ្លួនទារកនិងកុមារដែលចរាចរនៅលើទីផ្សារកម្ពុជាចំនួន១២ប្រភេទ មានផ្ទុកសារធាតុគីមី អាសបេស្តុស(Asbestos) ដែលបង្កគ្រោះថ្នាក់យ៉ាងខ្លាំងចំពោះសុខភាពមនុស្ស។ ជាពិសេសសារធាតុគីមីនេះ គឺអាចបង្កឱ្យកើតជំងឺមហារីកដល់អ្នកប្រើប្រាស់ដែលអ្នកម្ដាយមានកូនតូចៗត្រូវតែប្រុងប្រយ័ត្នខ្ពស់បំផុត។
លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ហៅកាត់ថាក.ប.ប បានបញ្ជាឱ្យក្រុមហ៊ុននានាប្រមូលម្សៅលាបខ្លួនទារកនិងកុមារ ពីទីផ្សារឱ្យអស់មកវិញ ក្រោយពីរកឃើញមានផ្ទុកសារធាតុគីមីអាសបេស្តុស ដែលបង្កគ្រោះថ្នាក់ដល់សុខភាពអ្នកប្រើប្រាស់។

ប្រភេទម្ស៉ៅទាំងនោះរួមមាន Johson’s baby powder380g, Johson’s blossoms baby powder 380g, D-nee Kids baby powder 380g, D-nee Newborn baby powder 380g, Pureen baby powder 125g, Laffair Be Love 320g, Kodomo baby powder 180g, BHAESAJ Cool powder 35g, និងBaby mild Natural’N Mild 180g។ ម្សៅលាបខ្លួនទារក និងកុមារទាំងនេះ ក.ប.ប បានបញ្ជាក់ថា ជាផលិតផលដែលផលិតនៅរោងចក្រក្នុងប្រទេសថៃ និងម៉ាលេស៊ី។
លោក ផាន អូន បានបន្តថា សារធាតុគីមីទាំងនោះ គឺអាចបង្កជាជំងឺមហារីកដល់អ្នកប្រើប្រាស់។ បច្ចុប្បន្ន យើងបានផ្អាកជាបណ្តោះអាសន្ននូវការនាំចូល និងចែកចាយផលិតផលនេះនៅលើទីផ្សារ រួមទាំងបញ្ជាឱ្យប្រមូលផលិតផលនេះពីទីផ្សារមកវិញ។

លោកបានបន្ថែមទៀតថា អគ្គនាយកដ្ឋាន ក.ប.ប ទុកពេលឱ្យក្រុមហ៊ុន ចំនួន១៤ថ្ងៃ ដោយចាប់ពីថ្ងៃទី២២សីហា ដល់៥កញ្ញា ឆ្នាំ២០២២ ក្នុងការសហការជាមួយ ក.ប.ប ដើម្បីនាំយកសំណាកនៃផលិតផលដែលត្រូវបានរកឃើញមានសារធាតុអាសបេស្តុសនោះ ទៅវិភាគបន្តនៅមន្ទីរពិសោធន៍ភាគីទី៣ ដែលមានសមត្ថភាព និងការទទួលស្គាល់ជាលក្ខណៈអន្តរជាតិ។

អគ្គនាយកនៃអគ្គនាយកដ្ឋាន ក.ប.ប រូបនេះ បានតម្រូវឱ្យក្រុមហ៊ុន ត្រូវបន្តកិច្ចសហការជាមួយរោងចក្រផលិត និងសមត្ថកិច្ច ក.ប.ប ដោយឈរលើគោលការណ៍តម្លាភាព និងគាំទ្រដោយមូលដ្ឋានវិទ្យាសាស្ត្រ ដើម្បីធានាបាននូវរាល់ផលិតផលម្សៅលាបខ្លួនទារក និងកុមារនេះ ត្រូវបានចែកចាយ និងដាក់លក់នៅលើទីផ្សារ ដោយគ្មានសារធាតុ អាសបេស្តុស នេះទៀតឡើយ៕