កាលពីពេលថ្មីៗនេះ អ្នកប្រើប្រាស់បណ្តាញសង្គមមានការភ្ញាក់ផ្អើល និងមានការចាប់អារម្មណ៍យ៉ាងខ្លាំង នៅពេលដែលបានដឹងថា នៅលើទឹកដីខេត្តសៀមរាប មានកន្លែងទេសចរណ៍ដ៏ប្លែកភ្នែកថ្មីមួយមិនធ្លាប់មាន និងជាកន្លែងកម្សាន្តលំដាប់ពិភពលោក។
អភិបាលខេត្តសៀមរាប ឯកឧត្តម ទៀ សីហា និងភរិយា ជាមួយនឹងក្រុមការងារ កាលពីចុងសប្តាហ៍កន្លងទៅនេះ ដែលបានទៅទស្សនាកន្លែងកម្សាន្តមួយនេះ បានឲ្យដឹងថា ឧទ្យានអង្គរវ៉ាយដ៏ឡាយហ្វ៏ និងអឹឃ្វារៀម (Angkor Wildlife and Aquarium) ដែលមានទីតាំងក្នុងស្រុកសូទ្រនិគម ខេត្តសៀមរាប គ្រោងនឹងបើកនៅចុងខែតុលា ឆ្នាំ២០២២ ឆាប់ៗខាងមុខនេះ។ ឧទ្យាននេះ នឹងក្លាយជាតំបន់ទាក់ទាញភ្ញៀវទេសចរដ៏មានសក្តានុពល អមជាមួយតំបន់ទេចរណ៍ជាច្រើនទៀតក្នុងខេត្តសៀមរាប។
ជាមួយគ្នានេះ ហ្វេសប៊ុកលោកជំទាវ ទាង អេង ភរិយា ឯកឧត្តម ទៀ សីហា បានបង្ហោះឲ្យដឹងថា ឧទ្យានមួយនេះបង្កើតឡើងដោយ Angkor Wildlife and Aquarium អាងចិញ្ចឹមត្រី និងអាណាចក្រអង្គរ សួនសត្វ ដែលសាងសង់លើផ្ទៃដីជាង ១០០ហិកតា ជាមួយនឹងទុនវិនិយោគសរុប ៧០លានដុល្លារអាមេរិក។ លោកជំទាវសម្ដែងក្ដីរំភើបថា៖ «ខ្ញុំមិននឹកស្មានថាប្រទេសខ្មែរយើងឥឡូវជឿនលឿនមិនចាញ់ស្រុកគេទេ អ្វីៗក៏មានហើយទំនើបទៀត សំខាន់នោះគឺមានសន្តិភាព សុវត្ថិភាពគ្រប់ទីកន្លែង ល្បឿននៃការអភិវឌ្ឍនលឿនហួសពីការរំពឹងទុកទៅទៀត»។
លោកជំទាវបន្តរៀបរាប់ថា៖ «ខ្ញុំបានដើរមើលនៅក្នុងឧទ្យានមួយនេះគឺមានចំណុចពិសេសច្រើន មួយគឺខ្ញុំមិនធ្លាប់បានឃើញត្រីទឹកសាបដែលរស់នៅក្នុងទន្លេមេគង្គ ដែលមានរូបរាងប្លែកធំគឺត្រីរាជ ទម្ងន់ដល់ទៅ ១០០គីឡូជាង និងកម្របានឃើញ, ទីពីរមានអ្នកជំនាញមើលថែត្រី និងអភិរក្សត្រីប្លែកៗ យ៉ាងយកចិត្តទុកដាក់។ ខ្ញុំគិតថាយើងគួរយកកូនៗមកលេងម្តង ហើយឲ្យពួកគាត់បានស្គាល់ថា នេះជាត្រីកម្ររបស់ខ្មែរយើង, ទីបីកន្លែងនេះនាំមកនូវការអប់រំសម្រាប់ប្រជាជនក្នុងស្រុក និងភ្ញៀវទេសចរអន្តរជាតិដែលមកទស្សនាខេត្តសៀមរាប»៕