“ពន្លឺតារានិករស្នេហ៍” ជាខ្សែភាពយន្តមួយ ដែលឆ្លុះបញ្ចាំងពីការធ្វើសង្គ្រាមមិនចេះចប់ ដោយសារភាពលោភលន់ ការដណ្តើមទឹកដីគ្នាទៅវិញទៅមករវាងអ្នកដឹកនាំកុលសម្ព័ន្ធ។ ការរៀបការ ដើម្បីចងសម្ព័ន្ធភាពរវាងព្រះនាងនៃកុលសម្ព័ន្ធ យៀកប៉ី និងស្តេច ឆាវ បានបរាជ័យ ហើយសោកនាដកម្មក៏បានកើតឡើង សម្តេចនៃកុលសម្ព័ន្ធ យៀកប៉ី ត្រូវបានអស់ជីវិតក្រោមស្នាដៃរបស់ស្តេច ឆាវ។
ស្តេច ឆាវ ជាមនុស្សសាហាវឃោឃៅ សម្លាប់គូសត្រូវដោយមិនញញើតដៃ ជាមនុស្សរឹងមាំ និងខ្លាំងក្លា ប៉ុន្តែបែរជាបាក់ចិត្តស្រលាញ់ទៅក្មេងស្រី ដែលមាននិស្ស័យខាងតារាសាស្ត្រ មានសមត្ថភាពពិសេសដឹងពីហេតុការណ៍អាក្រក់មុនទៅវិញ។
យៀកជឺ គឺជាក្មេងស្រីស្រស់ស្អាតម្នាក់ ដែលអាចដឹងមុននូវសោកនាដកម្ម និងគ្រោះមហន្តរាយជាច្រើនមុនពេលវាកើតឡើង។ ប៉ុន្តែជាអកុសលសមត្ថភាពពិសេសមួយនេះត្រូវបានអ្នកគ្រប់គ្នាយល់ថា គឺជារឿងអាក្រក់ ហើយចាត់ទុកនាងជាផ្កាយព្រះគ្រោះ។ យៀកជឺ ត្រូវបានមនុស្សជុំវិញខ្លួនរើសអើង ស្អប់ខ្ពើម មានតែមនុស្សចង់ធ្វើបាប និងសម្លាប់លើកលែងតែព្រះនាង យួយ ដែលតែងតែនៅក្បែរ និងការពារនាងគ្រប់ពេល អ្នកទាំងពីរបានសន្យាថានឹងនៅជាមួយគ្នាអស់មួយជីវិត។
ការទស្សទាយពីជោគវាសនា ដោយប្រើតារានិករ គឺជាជំនាញរបស់ យៀកជឺ ធ្វើអោយនាងតស៊ូ រើបម្រាស់ពីងារជាទាសករ ដើម្បីបានឡើងឋានៈធ្វើការផ្នែកតារាសាស្ត្រ។ ដោយសារភាពវ័យឆ្លាត និងភាពអត់ធ្មត់របស់នាង ទើប យៀកជឺ បានរៀបការជាមួយស្តេច ឆាវ។
មុនពេលបានជួបជាមួយស្តេច ឆាវ នាងក៏ធ្លាប់មានមិត្តម្នាក់ ដែលមានឈ្មោះថា អ៊ី អ៊ូយ៉ូវ ដែលជាមនុស្សបក្សី ទើបធ្វើអោយសង្គ្រាមរវាងមនុស្សបក្សី និងស្តេច ឆាវ បានកើតឡើង។ ចុងក្រោយ តើ យៀកជឺ នឹងមានវាសនាបានរស់នៅជាមួយនឹងស្តេច ឆាវ ឬ អ៊ី អ៊ូយ៉ូវ?
យ៉ាងណាក្តី នេះគ្រាន់តែជារៀបរាប់ត្រួសៗប៉ុណ្ណោះ សូមកុំភ្លេចរងចាំទស្សនាភាពយន្តភាគចិនរឿង «ពន្លឺតារានិករស្នេហ៍» ដែលនឹងមានផ្សាយជូនទស្សនាចាប់ពីថ្ងៃទី ០២ ខែ មីនា នៅលើកញ្ចក់ទូរទស្សន៍ ភីអិនអិន រៀងរាល់ថ្ងៃ ចន្ទ ដល់ថ្ងៃ ព្រហស្បតិ៍ ចាប់ពីវេលាម៉ោង ១២ ថ្ងៃត្រង់តទៅ៕