ភាពយន្តភាគថៃថ្មី «អាថ៌កំបាំងរឿងក្តីគីនរី» សាច់រឿងផ្តើមចេញពីការស៊ើបអង្កេតពីការស្លាប់យ៉ាងអាថ៌កំបាំងរបស់ជនជាតិបារាំងម្នាក់ ដោយអ្នកទទួលស៊ើបរឿងក្តីរកឃាតកពីជនជាតិថៃ និងជនជាតិបារាំងផ្ទាល់។ ភាគីខាងថៃ ព្យាយាមធ្វើយ៉ាងណាកុំអោយឃាតកគឺជាជនជាតិរបស់ខ្លួន ដើម្បីកុំអោយមានបញ្ហានៅក្នុងប្រទេស ចំណែកឯភាគីខាងជនជាតិបារាំង ក៏រកកលល្បិចយ៉ាងណា ធ្វើអោយឃាតកគឺជាជនជាតិថៃ ដើម្បីយកធ្វើជាលេសបង្ករជម្លោះ។ បញ្ហាដ៏អាថ៌កំបាំងមួយនេះ ក៏បានធ្លាក់ទៅលើលោកអុកហ្លួង អ៊ីន ថារ៉ាត់ បានជួបជាមួយអ្នកគ្រូពេទ្យ ភុតសន ទទួលស៊ើបរឿងក្តីវែករកមុខឃាតកពិតប្រាកដ។
អ្នកគ្រូពេទ្យមុខស្រស់ ភុតសន គឺជាមនុស្សចិត្តល្អ មានចំណេះដឹងជ្រៅជ្រះខាងមុខវិជ្ជាពេទ្យ ទទួលព្យាបាលអ្នកជំងឺគ្រប់ជាតិសាសន៍ ដោយមិនប្រកាន់វណ្ណៈ ព័ណ៌សម្បុរ មានឬក្រនោះទេ ចំពោះអ្នកក្រខ្សត់ជួយព្យាបាលដោយមិនយកប្រាក់ទៀតផង។ ដោយសារតែវិជ្ជាជីវៈគឺជា ពេទ្យ ត្រូវតែផ្តល់យុត្តិធម៌ដល់សាកសព ឬអ្នកជំងឺដែលមិនអាចមកបើកបង្ហាញការពិតដោយខ្លួនឯងបាន ទើបនាងត្រូវចូលខ្លួនមកធ្វើកោសលវិច្ច័យលើសាកសពរបស់កាពីទែន ឆង ដែលបានស្លាប់ដោយអាថ៌កំបាំងនោះ ដើម្បីស្វែងរកការពិត។
លោកអុកហ្លួង អ៊ីន ថារ៉ាត់ ដែលជាអ្នកមានឋានៈយសសក្តិក្នុងជួរមន្ត្រីរាជការ ជាមនុស្សមានចរឹកឆេវឆាវ ចូលចិត្តផឹកស្រា យល់ថាខ្លួនជាមនុស្សពូកែសម្តីអាក្រក់ ប៉ុន្តែក៏មានភាពស្មោះត្រង់ចំពោះជាតិមាតុភូមិ ក៏មានតួរនាទីយ៉ាងសំខាន់ក្នុងការស៊ើបរៀងក្តីមួយនេះដែរ ប៉ុន្តែលោកអុកហ្លួង អ៊ីន ម្នាក់នេះដូចជាមានការមិនពេញចិត្តជាមួយគ្រួសាររបស់អ្នកគ្រូពេទ្យ ភុតសន ឡើង ហាក់ដូចជាមានគំនុំជាមួយគ្នា ទើបធ្វើអោយលោក អ៊ីន ដូចជាអគតិទៅលើ ភុតសន ជាខ្លាំង ព្រមទាំងមើលងាយទៅលើសមត្ថភាពនាងជាគ្រូពេទ្យស្រីនៅក្នុងសម័យនោះ។
តើនណាជាឃាតកពិតប្រាកដ? រវាងអ្នកទោសដែលមានគំនុំជាមួយកាពីទែន ឆង ស្រាប់ និងអ្នកមានវណ្ណៈអភិជនណាម្នាក់ ដែលស្អប់ទៅលើអ្នកស្លាប់? គួរបញ្ជាក់ដែរថា កាពីទែន ឆង គឺជាមនុស្សញៀនស្រា ស្រី ទោះបីជាមានឋានៈយសស័ក្តិធំពិតមែន ប៉ុន្តែក៏មានមនុស្សជុំវិញខ្លួនជាច្រើនដែលមិនចូលចិត្ត។
អាថ៌កំបាំង និងគំនុំនៅក្នុងចិត្តរបស់អុកហ្លួង អ៊ីន ថារ៉ាត់ ជាមួយនឹងគ្រួសាររបស់អ្នកគ្រូពេទ្យ ភុតសន ជាអ្វី? តើការធ្វើការរួមគ្នារវាងអ្នកទាំងពីក្នុងការបំបែករឿងក្តីអាចរកការពិតបានដែរទេ? ហើយរវាងគំនុំរបស់គ្រួសារទាំងពីរអាចប្តូរមកជាទំនាក់ទំនងល្អនឹងគ្នាបានដែរទេ បន្ទាប់ពីបញ្ចប់រឿងក្តីរបស់កាពីទែន ឆង?
គួរបញ្ជាក់ដែរថា «អាថ៌កំបាំងរឿងក្តីគីនរី» កំពុងចាក់បញ្ចាំងនៅលើកញ្ចក់ទូរទស្សន៍ ភីអិនអិន រួចមកហើយ ដែលមានផ្សាយជូនទស្សនានៅរៀងរាល់ថ្ងៃ ចន្ទ ដល់ថ្ងៃ ព្រហស្បតិ៍ វេលាម៉ោង ៦ ល្ងាចតទៅ៕