សម្តេចតេ ជោ ហ៊ុន សែន នាយដ្ឋមន្ត្រីនៃប្រទេសកម្ពុជា នៅព្រឹកថ្ងៃទី៨ ខែមេសា ឆ្នាំ២០២៣នេះ បានប្រកាសផ្តល់ថវិកាដល់កីឡាករប្រដាល់សញ្ជាតិប្រេស៊ីល Thiago Teixeira ចំនួន២០,០០០ដុល្លាដើម្បីជាការលើកទឹកចិត្ត បន្ទាប់ពីកីឡាកររូបនេះត្រូវបានស្ថាប័នប្រដាល់មួយថៃពិភពលោកបានដកហូតខ្សែក្រវាត់វិញ និងមិនទទួលបានតម្លៃខ្លួនប្រកួត ។
មិនតែប៉ុណ្ណោះ សម្តេចតេជោ លោកបានមានប្រសាន៍ទៀត ប្រសិនបើមិនខុសទាស់ផ្នែកផ្លូវច្បាប់ណាមួយរបស់ប្រទេសប្រេស៊ីល សម្តេចនិង នឹងស្នើទៅព្រះមហាក្សត្រ ដើម្បីផ្តល់សញ្ជាតិខ្មែរជូនកីឡាករ Thiago ។
ដោយសម្តេចតេ ជោ ហ៊ុន សែន បានមានប្រសាសន៍ថា “ដើម្បីជាការលើកទឹកចិត្ត ខ្ញុំសូមចូលរួមជួយឧបត្ថម្ភដល់កីឡាករប្រដាល់ Thiago Teixeira សញ្ជាតិប្រេស៊ីល នូវថវិកាចំនួន២០,០០០ដុល្លារ។ មួយវិញទៀតប្រសិនបើមិនខុសទាស់ផ្នែកផ្លូវច្បាប់ណាមួយរបស់ប្រេស៊ីល ខ្ញុំនឹងស្នើទៅព្រះមហាក្សត្រ ដើម្បីផ្តល់សញ្ជាតិខ្មែរជូនកីឡាករ Thiago” ។
គួបញ្ជាក់ថា កីឡាករសញ្ជាតិប្រេស៊ីល Thiago Teixeira បានចេញទៅតំណាងគុនខ្មែរ កាលពីថ្ងៃទី ២ ខែ មេសា ឆ្នាំ ២០២៣ នេះ ដោយឈ្នះ កីឡាករអង់គ្លេស Joe Craven តំណាងប្រដាល់ថៃក្នុងងទឹកទី២នៅកម្មវិធីប្រដាល់ Apex Fight Series នៅប្រទេសអាល្លឺម៉ង់ ។ ក៏ប៉ុន្តែកីឡារូបនេះ ត្រូវបានស្ថាប័នប្រដាល់មួយថៃពិភពលោកបានចេញសេចក្តីប្រកាសពីការដកហូតខ្សែក្រវ៉ាត់មួយថៃពិភពលោក (WMO) និងថែមទាំងមិនទទួលបានតម្លៃខ្លួន ក្រោយដឹងថា កីឡាករ Thiago ប្រកួតតំណាងឱ្យគុនខ្មែរ។
ឃើញបែបនេះ ស្ថាប័នប្រដាល់មួយថៃ មិនពេញចិត្ត និងសម្រេចដកហូតខ្សែក្រវាត់ពី Thiago ថែមទាំងដាក់បំរាម មិនឲ្យប្រកួតគ្រប់កម្មវិធីទាំងអស់នាពេលអនាគត។ ជាងនេះទៀតនោះ តម្លៃខ្លួនប្រមាណ៣៥០០ដុល្លារអាមេរិកពីការប្រកួតកាលពីថ្ងៃទី២ ខែមេសា កីឡាករប្រេស៊ីលរូបនេះមិនបានទទួលឡើយ៕