សារព័ត៌មាន ក្បោះក្បាយ បានសហការជាមួយកម្មវិធីប្រកួតប្រជែងថ្មីសន្លាងគឺ Mister of Cambodia ដើម្បីជំរុញវិស័យប្រកួតប្រជែងបុរសឯកនៅ កម្ពុជា ឱ្យកាន់តែទូលំទូលាយ ខណៈកម្មវិធីនេះកំពុងទទួលពាក្យប្រកួតប្រជែងពីបេក្ខភាពនានារហូតដល់ចុងខែ មីនា ឆ្នាំ២០២៤ ខាងមុខនេះ។
អ្នករៀបចំកម្មវិធីដ៏ល្បីឈ្មោះលោក ម៉ែន និមលរតន៍ បាននិយាយថាកម្មវិធីថ្មីសន្លាង Mister of Cambodia ឬបុរសឯកកម្ពុជា លោកបានរៀបចំឡើងក្នុងគោលបំណងដើម្បី ជាវេទិកាមួយសម្រាប់យុវជនក្នុងការកសាងទំនុកចិត្តលើខ្លួនឯង និងបញ្ឆេះការផ្លាស់ប្តូរជាវិជ្ជមាននៅក្នុងខ្លួនគាត់ និងសហគមន៍ទូទាំងពិភពលោក។
ក្នុងនោះការបណ្តុះ និងកសាងភាពអ្នកដឹកនាំ ឬជាគំរូក្នុងក្រសែភ្នែកសង្គមជាតិ។ ក្រៅពីមានចិត្តសប្បុរស និងចិត្តទូលាយ បុរសឯកកម្ពុជាត្រូវប្រើទេពកោសល្យ ជំនាញ ព្រមទាំងពេលវេលាជួយ និងអប់រំអ្នកដទៃឲ្យមានផលវិជ្ជមានដល់សង្គម។
លោកបានបន្តថា បុរសឯកកម្ពុជា គាំទ្រ គ្មានការស្អប់ និងរើសអើង សមភាព និងឱកាស វេទិកាដែលនិយាយថាទេចំពោះទម្រង់នៃការស្អប់ណាមួយ ជាវេទិកាដែលផ្តល់ និងជឿថាជីវិតដែលរស់នៅទាំងអស់គួរតែត្រូវបានផ្តល់ដោយសមភាព ដោយមិនគិតពីភេទ ពូជសាសន៍ ឬឋានៈសង្គម។ លុបបំបាត់ការរើសអើងដែលមិនចាំបាច់ ផ្តល់ការគាំទ្រយ៉ាងពិតប្រាកដទាំងផ្លូវកាយ ផ្លូវចិត្ត និងឱកាសដើម្បីមានអនាគតភ្លឺស្វាង និងឯករាជ្យ។
អតីតអ្នកគ្រប់គ្រងកម្មវិធី Miss Universe Cambodia បានអះអាងថា ដំបូងឡើយលោកគិតថាមិនចង់រៀបចំទេ តែដោយមើលឃើញបេក្ខភាពរបស់យើងចង់ដាក់ពាក្យ និងចូលរួមប្រកួតសុទ្ធតែតែស្រស់ស្អាត និងមានសមត្ថភាពខ្លាំងទើបលោករៀបចំកម្មវិធីឡើងតែម្ដងទៅ”។
លោក ម៉ែន និមលរតន៍ បានបន្តថា សម្រាប់ បុរសឯកកមម្ពុជា នេះគឺជាកម្មវិធីថ្មី និងដំបូងដែលលោករៀបចំប្រកូតឡើង។ បេក្ខភាពមួយចំនួនបានដាក់ពាក្យមករួចរាល់អស់ហើយ ហើយកម្មវិធីនេះនៅតែបន្តជ្រើសរើស និងទទួលពាក្យដដែលរហូតដល់ចុងខែ មីនា ឆ្នាំ២០២៤ នេះ។
សម្រាប់តារាម៉ូដែល និងមិត្តៗយុវវ័យចង់ចូលរួមការប្រកួតនេះអាចដាក់ពាក្យ ឬទាក់ទងមកផេកផ្លុវការ Mister of Cambodia បានគ្រប់ពេល។ កម្មវិធីប្រកួតនឹងចាប់ផ្ដើមនៅខែ មេសា ឆ្នាំ២០២៤ ខាងមុខ។
បើទោះជាដឹងថាអាចនឹងមានឧបសគ្គខ្លះៗក្ដី ក៏ប៉ុន្តែលោក ម៉ែន និមលរតន៍ រំពឹងថាការរៀបចំប្រកួតដំបូងនៃកម្មវិធីនេះនឹងទទួលបានការគាំទ្រ ហើយអាចនឹងជោកជ័យខ្លាំងថែមទៀតផង។
លោកបានសង្កត់ធ្ងន់ថាម្ចាស់ជយលាភី ២រូបនឹងមានឱកាសចេញទៅប្រកួតកម្មវិធីថ្នាក់អន្តរជាតិនៅប្រទេស វៀតណាម និងឥណ្ឌូណេស៊ី នាពេលដ៏ខ្លីខាងមុខ។ ប្រការបែបនេះហើយទើបលោកស្នើឱ្យអ្នកចង់ចូលរួមដាក់ពាក្យប្រកួតប្រជែងកម្មវិធីខាងលើអាចដាក់ពាក្យឱ្យបានទាន់ពេលវេលា។
សូមបញ្ជាក់ថារហូតមកទល់នឹងពេលនេះកម្មវិធី Mister of Cambodia ទទួលបានបេក្ខភាពឆ្នើមៗប្រមាណជាង ១០នាក់មកហើយ ហើយកម្មវិធីនឹងបន្តទទួលពាក្យបេក្ខភាពរហូតដល់ចុងខែមីនា ឆ្នាំ២០២៤ នេះមុននឹងការប្រកួតផ្លូវការចាប់ផ្ដើមនាខែ មេសា ឆ្នាំ២០២៤ខាងមុខ៕
