ក្រសួងបរិស្ថានបានអោយដឹងថានៅថ្ងៃទី៤ ខែឧសភា ឆ្នាំ២០២២ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថា និងមន្ត្រីពាក់ព័ន្ធ ព្រមទាំងមន្ទីរអង្គភាពជុំវិញខេត្ត បានសម្ពោធដាក់ឱ្យប្រើប្រាស់ជាផ្លូវការ ផ្លូវបេតុងប្រវែង ៦គីឡូម៉ែត្រស្ថិតនៅភ្នំកែបធំនៃឧទ្យានជាតិកែបប្រសិទ្ធិនាមថា «រុក្ខវិថីបុប្ជាប្រសិទ្ធ» ។
រុក្ខវិថីបុប្ជាប្រសិទ្ធដែលឯកឧត្តមរដ្ឋមន្ត្រីក្រសួងបរិស្ថាន បានចាត់ទុកថាជាមិនត្រឹមតែជាមធ្យោបាយសម្រាប់ធ្វើដំណើរប៉ុណ្ណោះទេ តែផ្លូវនេះគឺជាការវិនិយោគទៅលើសេដ្ឋកិច្ចមូលដ្ឋានរបស់ខេត្តកែប ទាក់ទាញភ្ញៀវទេសចរមកលំហែកម្សាន្តបែបធម្មជាតិ ស្រូបខ្យល់អាកាសបរិសុទ្ធ គយគន់រុក្ខជាតិពណ៍បៃតងជាច្រើននៅក្នុងព្រៃឧទ្យានជាតិនេះ។
ឯកឧត្តម សាយ សំអាល់ បានមានប្រសាសន៍ថា រុក្ខវិថីប្រវែង ៦គីឡូម៉ែត្រនេះត្រូវបានស្តារនិងសាងសង់ឡើងដោយប្រើប្រាស់ថវិកាបានមកពីការលក់ឥណទានកាបូន និងទុកជាប្រយោជន៍សម្រាប់ការប្រើប្រាស់របស់ប្រជាពលរដ្ឋ។
ឯកឧត្តមរដ្ឋមន្ត្រីក្រសួងបរិស្ថានបានគូសបញ្ជាក់ថាទន្ទឹមនឹងការគ្រប់គ្រងអភិរក្សឱ្យបានល្អប្រសើរ ក្រសួងបរិស្ថានបានគិតគូរក្នុងការប្រែក្លាយតំបន់អភិរក្សធម្មជាតិមួយចំនួនដូចជាឧទ្យានជាតិ ដែនជម្រកសត្វព្រៃដែលមានសក្តានុពលទេសចរណ៍ មិនត្រឹមតែជាកន្លែងថែរក្សាអភិរក្សធនធានធម្មជាតិ សត្វព្រៃ និងជីវៈចម្រុះ តែក៏ជាកន្លែងទេសចរណ៍ធម្មជាតិសម្រាប់ប្រជាពលរដ្ឋ និងភ្ញៀវទេសចរដើរកម្សាន្ត។
ឯកឧត្តម សោម ពិសិដ្ឋ អភិបាលខេត្តកែប មានប្រសាសន៍ថា រដ្ឋបាលខេត្ត បានខិតខំយកចិត្តទុកដាក់ចំពោះការគាំពារបរិស្ថាន ការអភិរក្សជីវៈចម្រុះប្រកបដោយចីរភាព ការកសាងហេដ្ឋារចនាសម្ព័ន្ធជារូបវន្តជាដើម ដូចថ្ងៃនេះ ខេត្តកែបបានជួសជុល ស្ថាបនាឡើងវិញ និងសម្ពោធឱ្យប្រើប្រាស់នៅផ្លូវបេតុងជុំវិញឧទ្យានជាតិកែប ដែលជាផ្លូវចាស់ ក្នុងសម័យសង្គមរាស្ត្រ និយម ហើយផ្លូវនេះត្រូវបានជួសជុលជាបន្តបន្ទាប់ លើកទី១ ឆ្នាំ១៩៩៨, លើកទី២ ឆ្នាំ២០០៤ , លើកទី៣ ឆ្នាំ២០០៩-២០១០ ជួសជុលពង្រីកអោយធំ និងលើកទី៤ ជួសជុល ស្ថាបនា ចាក់បេតុង មានទទឹង ៣ម៉ែត្រ បណ្តោយ ៦,០០០ម៉ែត្រ ដោយប្រើប្រាស់ថវិការបស់ក្រសួងបរិស្ថាន ដោយចាប់ផ្តើមជួសជុល នៅថ្ងៃទី២៧ ខែមករា និងបញ្ចប់នៅថ្ងៃទី៣០ ខែមេសា ឆ្នាំ២០២២។
ឯកឧត្តម បន្តថា ក្រៅពីការអភិវឌ្ឍន៍ហេដ្ឋារចនាសម្ព័ន្ធ មានផ្លូវកៅស៊ូ ផ្លូវបេតុង កំពង់ផែកោះទន្សាយ ផ្លូវគ្រួសក្រហម រដ្ឋបាលខេត្តកែប ក៏មានសមិទ្ធផលផ្សេងទៀតដែរ ក្នុងការថែរក្សាបរិស្ថាន មានដូចជា ទីលានចាក់សំរាម ទំហំ ១៣.៣៩ ហិចតា អាងប្រព្រឹត្តិកម្មចម្រោះទឹកកខ្វក់ ឡដុតសំរាមតាមលក្ខណៈបច្ចេកទេស ផងដែរ៕ រូបភាព៖ ក្រសួងបរិស្ថាន
