លោក គង់ វិបុល អគ្គនាយកដ្ឋានពន្ធដារ បាននិយាយថា តាមរយៈការពង្រឹង និងចាត់វិធានការច្បាប់ច្បាស់លាស់ចំពោះករណីបទល្មើសគេចវេសពន្ធដែលមានការរៀបចំជាប្រព័ន្ធ និងការកិបកេងបន្លំពន្ធ ក្នុងទឹកប្រាក់ពន្ធចំនួនច្រើន ដោយសហការជាមួយក្រសួង ស្ថាប័នពាក់ព័ន្ធនានាបានធ្វើឱ្យពន្ធដារប្រមូលពន្ធបានប្រមាណ ១៧២៦ លានដុល្លារ ស្មើនឹង ៦១,២៥% នៃផែនការច្បាប់ហិរញ្ញវត្ថុប្រចាំឆ្នាំ។ ចំណូលនេះ មានការកើនឡើងប្រមាណ ៣៧៧ លានដុល្លារ ដែលស្មើនឹង ២៧,៩៥ ភាគរយ បើប្រៀបធៀបទៅនឹងរយៈពេលដូចគ្នាឆ្នាំ ២០២១។
យោងតាមរបាយការណ៍របស់អគ្គនាយកដ្ឋានពន្ធដារ បានចេញផ្សាយកាលពីថ្ងៃទី១៤ ខែមិថុនា ឆ្នាំ២០២២ ក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែឧសភា និងសម្រាប់រយៈពេល៥ខែ ឆ្នាំ២០២២ថា ក្នុងរយៈពេល៥ ខែ ចំណូលពីប្រភេទពន្ធសំខាន់ៗបានរក្សាកំណើនក្នុងរង្វង់ ២៥ភាគរយ ទៅ ៤៥ភាគរយ បើធៀបទៅនឹងរយៈពេលដូចគ្នាក្នុង ឆ្នាំ ២០២១ ដែលនៅក្នុងនោះ ពន្ធលើប្រាក់ចំណូលមានប្រមាណ ២៥,៩៨ ភាគរយ អាករលើតម្លៃបន្ថែម ២៦,៤២ ភាគរយ ពន្ធលើប្រាក់បៀវត្ស ២៦,៣៨ ភាគរយ អាករពិសេស ៣៣,៤១ ភាគរយ និងពន្ធប្រថាប់ត្រាលើការផ្ទេរកម្មសិទ្ធិអចលនទ្រព្យ ៤៤,៣៨ ភាគរយ។
លោក គង់ វិបុល អគ្គនាយកដ្ឋានពន្ធដារ បានឱ្យដឹងថា នៅក្នុងខែ ឧសភា ឆ្នាំ ២០២២ ចំណូលពន្ធអាករគ្រប់ប្រភេទ ដែលអគ្គនាយកដ្ឋានប្រមូលបានជាក់ស្តែងតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកពន្ធដារ មានចំនួន ២២៥លានដុល្លារ ស្មើនឹង ៧,៩៨ភាគរយនៃផែនការច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ ២០២២។ បើប្រៀបធៀបចំណូលពន្ធអាករប្រចាំខែ ឧសភា ឆ្នាំ ២០២១ មានចំនួន ៣៦,៣៧លានដុល្លារ ស្មើនឹង ១៩,២៨ភាគរយ។
អគ្គនាយកដ្ឋានពន្ធដារលោក គង់ វិបុល បានថ្លែងនូវអំណរគុណ យ៉ាងជ្រាលជ្រៅចំពោះ ថ្នាក់ដឹកនាំ និងមន្ត្រីរាជការពន្ធដារគ្រប់ជាន់ថ្នាក់ នៅតាមអង្គភាពក្រោមចំណុះអគ្គនាយកដ្ឋានពន្ធដារ ដែលបាននិងកំពុងចូលរួមយ៉ាងសកម្ម ក្នុងការខិតខំប្រឹងប្រែងប្រមូលចំណូល ដែលទទួលបានលទ្ធផលយ៉ាងល្អប្រសើរ ហើយនេះ គឺជាជោគជ័យនិងជាសមិទ្ធផលរួមរបស់អគ្គនាយកដ្ឋានពន្ធដារទាំងមូល៕
