ប្រជានេសាទនៅភូមិកោះព្រះក្នុងស្រុកសៀមបូក ធ្វើការនេសាទបាន ត្រីបបែលយក្សទឹកសាប១ក្បាលទៀតហើយ រួចក៏រាយការណ៍ជូនសហគមន៍ ដើម្បីប្រគល់ទៅឲ្យខណ្ឌរដ្ឋបាលជលផលខេត្ត និងគម្រោងអច្ឆរិយភាពនៃទន្លេមេគង្គ។
លោកស្រី សម វិចិត្រ នាយខណ្ឌរដ្ឋបាលជលផលបានឲ្យដឹងថា បន្ទាប់ពីទទួលបានព័ត៌មាននេះ ក្រុមការងារជំនាញបានទៅដល់សហគមន៍ដើម្បីធ្វើការវាស់ថ្លឹង និងកឹបស្លាកលេខ យកសំណាកធ្វើDNA។
លោកបន្តថា នៅថ្ងៃទី១៤ ខែមិថុនា ឆ្នាំ២០២២ ក្រុមការងារនៃខណ្ឌរដ្ឋបាលជលផលខេត្ត និងវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល និងក្រុមការងារគម្រោងអច្ឆរិយៈ នៃទន្លេមេគង្គ បាន លែងចូលទៅក្នុងធម្មជាតិវិញ ។ នាយខណ្ឌក៏បានឲ្យដឹងដែរថា ត្រីបបែលនេះ ជាប្រភេទបបែលញី ទម្ងន់៣០០គីឡូក្រាម ពីក្បាលដល់ចុងកន្ទុយ មានប្រវែង៣៩៨សង់ទីម៉ែត្រផងដែរ។
នេះជាត្រីបបែលយក្សទឹកសាបទី៣ហើយ ដែលបានលែងទៅវិញនៅក្នុងស្រុកសៀមបូក ខេត្តស្ទឹងត្រែង ខណៈការលែងត្រីបបែលទឹកសាបនេះមានការចូលរួមពីមន្ត្រីវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាបនៃរដ្ឋបាលជលផល នាយរងផ្នែករដ្ឋបាលជលផលថាឡាបរិវ៉ាត់ នៃខណ្ឌរដ្ឋបាលជលផលស្ទឹងត្រែង ក្រុមការងារគម្រោងអច្ឆរិយៈនៃទន្លេមេគង្គ អាជាធរ ឃុំកោះព្រះ កម្លាំងប៉ុស្តិ៍នគរបាលរដ្ឋបាលឃុំកោះព្រះ និងសហគមន៍នេសាទភូមិកោះព្រះ៕
