តារាសម្ដែង និងជាតារាម៉ូដែលកំពុងមានទីផ្សារកញ្ញា រ៉េត សារីតា បានបង្ហាញពីភាពភ្ញាក់ផ្អើលរបស់ខ្លួនបន្ទាប់ពីកញ្ញាបានឈ្នះពាន «តារាសម្តែងដែលមានទេពកោសល្យខ្ពស់ជាងគេបង្អស់» ពីមហោស្រពភាពយន្តអន្តរជាតិកម្ពុជាលើកទី១០ កាលពីថ្ងៃទី ១៥ ខែមិនថុនា ឆ្នាំ២០២២ម្សិលមិញ។
កញ្ញាបានបង្ហាញអារម្មណ៍រីករាយ និងមិនដែលនឹកស្មានថាខ្លួនអាចឈានដល់កម្រិតឈ្នះពានបែបនេះនោះទេនាពេលកន្លងមក។
តារាម៉ូដែលវ័យក្មេងរូបនេះបានបញ្ជាក់ថា៖”ខ្ញុំពិតជាភ្ញាក់ផ្អើលខ្លាំងមែនទែនបងសម្រាប់ពានរង្វាន់មួយនេះ ព្រោះអីអ្នករៀបចំមិនបានប្រាប់យើងទេពេលយើងចូលរួម”។
បវរកញ្ញាចក្រវាឡកម្ពុជាឆ្នាំ២០២០ ខាងបន្តថាពានរង្វាន់មួយនេះគឺជាកត្តិយសមុខមាត់ និងការជំរុញលើកទឹកចិត្តបន្ថែមទៀតសម្រាប់កញ្ញា ក្នុងការដើរលើវិថីសិល្បៈ ដើម្បីធ្វើយ៉ាងណាជំរុញ និងលើកកម្ពស់សិល្បៈខ្មែ។ ជាពិសេសផ្នែកបវរកញ្ញានេះតែម្ដង ដើម្បីឱ្យកម្ពុជាកាន់តែមានភាពល្បីឈ្មោះលើឆាកអន្តរជាតិ។
គួររំលឹកថា មុនចូលរួមប្រកួតបង្អួតសម្រស់ កញ្ញា រ៉េត សារីតា ជាតារាសម្ដែងស្រីមួយរូបដែលបានប្រឡូកក្នុងវិស័យសម្ដែងយ៉ាងជោគជាំមកហើយ ដោយនាងបានបោះជំហានចូលប្រឡូកការសម្ដែងទាំងជាតិ និងអន្តរជាតិ។
ភាពយន្តដែលកញ្ញាបានសម្ដែងកន្លងមករួមមាន រឿង «California Dreaming by Meas sreylin», រឿង «Gray Feather», រឿង «មុនពេលភ្លៀង», រឿង «ចងពា» និងរឿង «ឡូយ៩» ជាដើម។
យ៉ាងណាមិញមហាជនស្គាល់កញ្ញា រ៉េត សារីតា កាន់តែច្រើនឡើងនៅពេលនាងបោះជំហានចូលក្នុងវិស័យប្រកួត និងទទួលបានជាម្ចាស់មកុដបវរកញ្ញាចក្រវាឡឆ្នាំ២០២០។ ដ្បិតការប្រកួតកន្លងផុតទៅ២ឆ្នាំហើយក្តី ប៉ុន្តែ សារីតា នៅតែជាបវរកញ្ញាចក្រវាឡម្នាក់ដែលស្ថិតនៅក្នុងដួងចិត្តអ្នកគាំទ្រមិនប្រូួលប្រែ៕
