ភ្នំពេញ ៖ នារីម្នាក់រួមដំណើរបើករថយន្តរេចង្កូតទៅបុករះដើមឈើមួយដើមបាក់រាបដល់ដី នឹងបន្តបុកកន្លែងលក់បន្លែ និងកន្លែងលក់គុយទាវ បណ្តាលឲ្យក្មេងប្រុសម្នាក់រងរបួសដោយរលាកទឹកស៊ុប ។
ហេតុការណ៍នេះបង្កឲ្យមានការភ្ញាក់ផ្អើលឡើងកាលពីម៉ោង ១ និង៣០នាទីរំលងអាធ្រាត្រឈានចូលថ្ងៃទី ១១ ខែឧសភា ឆ្នាំ២០២២ នៅតាមបណ្ដោយផ្លូវព្រះមុនីរ៉េត ស្ថិតក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញនារីម្នាក់រួមដំណើរជាមួយនារីម្នាក់ទៀតបើករថយន្តស៊េរីម៉ាកឡង់គ្រីស័រ ពណ៌ខ្មៅ ពាក់ស្លាកលេខភ្នំពេញ2V-6686 ធ្វើដំណើរតាមបណ្តោយផ្លូវរះមុនីរ៉េត ក្នុងទិសដៅពីកើតទៅលិចយ៉ាងលឿន ខណៈមកដល់ចំណុចកើតហេតុបានរេចង្កូតជ្រុលទៅបុកដើមឈើមួយដើមបណ្ដាលឲ្យបាក់រាបដល់ដី រួចបន្តទៅបុកកន្លែងលក់បន្លែនិងកន្លែងលក់គុយទាវ បណ្ដាលឲ្យក្មេងប្រុសម្នាក់ រងរបួសដោយសាររលាកទឹកស៊ុប។
បន្ទាប់ពីកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុដោយភាគីបង្កសុំសម្របសម្រួលគ្នាជាមួយខាងភាគីលក់បន្លែនិងកន្លែងលក់គុយទាវ ព្រមទាំងតំណាងក្មេងរងគ្រោះដើម្បីបញ្ចប់រឿងនៅកន្លែងកើតហេតុ ។ ប៉ុន្តែនៅឡើយដើមឈើដែលជាសម្បត្តិរដ្ឋ ទើបសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចរាចរណ៍ចុះមកស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រងចាំដោះស្រាយគ្នានៅពេលក្រោយ៕ 
