ភ្នំពេញ ៖ បុរសម្នាក់ទំនងជាស្រវឹងស្រា បានបើករថយន្តយ៉ាងលឿនជ្រុលទៅបុកខឿនសួនមាត់ទន្លេ បណ្ដាលឱ្យបែកម៉ាស៊ីនរថយន្តហូរប្រេងទៅមុខលែងរួច តែសំណាងល្អដែលមិនជ្រុលធ្លាក់ចូលទៅក្នុងទន្លេ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីម៉ោង១២ និង ១០នាទីរំលងអធ្រាត្រឈានចូលថ្ងៃទី១១ ខែឧសភា ឆ្នាំ២០២២ នៅចំណុចលើសួនមាត់ទន្លេ តាមបណ្ដោយផ្លូវព្រះស៊ីសុវត្ថិ កែងផ្លូវ១១៨ ស្ថិតក្នុងសង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឱ្យដឹងថា មុនកើតពេលហេតុគេឃើញបុរសម្នាក់ទំនងជាស្រវឹងស្រាបានបើករថយន្តម៉ាក BMW ពណ៌ខ្មៅពាក់ស្លាកលេខ ភ្នំពេញ2AQ-7826 ធ្វើដំណើរតាមបណ្តោយផ្លូវលេខ១១៨ ក្នុងទិសដៅពីលិចទៅកើតយ៉ាងលឿន ខណៈមកដល់ចំណុចកែងផ្លូវព្រះស៊ីសុវត្ថិ រថយន្តជ្រុលចង្កូតទៅត្រង់យ៉ាងលឿនបុកខឿនសួន រួចបន្តឡើងទៅលើសួនជិតដល់មាត់ទន្លេ បណ្តាលឱ្យរថយន្តបែកម៉ាស៊ីនហូរប្រេងពេញសួនបើកទៅមុខលែងរួច ។
បន្ទាប់កើតហេតុ សមត្ថកិច្ចមូលដ្ឋានបានចុះមកដល់បានពិនិត្យនៅកន្លែងកើតហេតុ ដោយមិនមានរងការខូចខាតខឿនសួន និងមិនប៉ះពាល់ដល់សួន ទើបសមត្ថកិច្ចឱ្យម្ចាស់រថយន្តហៅរថយន្តស្ទូចយកទៅជួសជុលដោយខ្លួនឯង៕
