ខេត្តព្រះវិហារ ៖ បន្ទាប់ពីរត់គេចខ្លួនបានរយៈពេល០៣ថ្ងៃ ក្រោយពីកាប់អ្នកដើរទិញអេតចាយម្នាក់ស្លាប់ក្នុងថ្លុកឈាម ជនសង្ស័យជាឃាតករ ត្រូវកងរាជអាវុធហត្ថខេត្តព្រះវិហារ ឃាត់ខ្លួនជនសង្ស័យ បានហើយកាលពីរសៀល ថ្ងៃទី១១ ខែឧសភា ឆ្នាំ២០២២ ដោយជនសង្ស័យគឺជាមនុស្សសរសៃប្រសាទ នឹងប្រើប្រាស់ថ្នាំសរសៃប្រសាទ ជាប្រចាំផងដែរ។
សមត្ថកិច្ចកងរាជអាវុធហត្ថ ឃាត់ខ្លួនជនសង្ស័យ នៅចំណុចវាលស្រែ ជិតជើងភ្នំត្បែងមាន ជ័យ ស្ថិតក្នុងភូមិមហាផល ឃុំឈានមុខ ស្រុកត្បែង មានជ័យ ខេត្តព្រះវិហារ។
សូមរំលឹកផងដែរថា ៖ កាលពីថ្ងៃទី៨ ខែឧសភា ឆ្នាំ២០២២ មានករណី ឃាតកម្មមួយ បានកើតឡើង ស្ថិតក្នុងភូមិមហាផល ឃុំឈានមុខ ស្រុកត្បែង មានជ័យ ខេត្តព្រះវិហារ ។ ក្រោយពីកើតហេតុនេះ កម្លាំងអាវុធហត្ថ បានចុះស្រាវជ្រាវ ឈានដល់ឃាត់ខ្លួនជនសង្ស័យម្នាក់ ឈ្មោះ មុំ ថា អាយុ ៣០ ឆ្នាំ រស់នៅភូមិមហាផល ឃុំឈានមុខ ស្រុកត្បែងមានជ័យ ខេត្តព្រះវិហារ។ ជនសង្ស័យ បានប្រើកាំបិត កាប់សម្លាប់ឈ្មោះ ទុយ ទឺ អាយុ ២៣ ឆ្នាំ រស់នៅភូមិស្លាករ ឃុំបន្ទាយស្ទោង ស្រុកស្ទោង ខេត្តកំពង់ធំ ដែលបានមក ស្នាក់នៅ ខេត្តព្រះវិហារ ប្រកបរបរ ជាអ្នកដើរទិញអេតចាយ ។ ការឃាត់ខ្លួននេះ គឺរយៈពេល ៣ ថ្ងៃ ក្រោយកើតហេតុ។
សមត្ថកិច្ច បន្តថា កាលពីថ្ងៃកើតហេតុ ជនសង្ស័យធ្វើសកម្មភាព កាប់សម្លាប់ជនរង គ្រោះ ចំនួន ៥ កាំបិតខ្វែវ រួចគេចខ្លួន ទៅលាក់ខ្លួននៅជើងភ្នំ ។ ជនសង្ស័យ និងជនរងគ្រោះ ពុំដែលស្គាល់គ្នាទេ ពីមុនមក។ នៅថ្ងៃកើតហេតុ ជនរងគ្រោះ បានជិះម៉ូតូអូសរ៉ឺម៉ក ដឹកអេតចាយ តាមផ្លូវជាតិលេខ៦២ ស្ថិតក្នុងភូមិឃុំកើតហេតុ។ លុះដល់មុខផ្ទះជនសង្ស័យ ដោយសារអាកាស ធាតុក្តៅពេក ក៏បានឈប់ម៉ូតូ អង្គុយហូបចំណី ក៏ស្រាប់តែជនសង្ស័យ បាញ់ចម្ពាមកៅស៊ូ សំដៅមកជនរងគ្រោះ តែមិនត្រូវ។ ពេលនោះ ជនរងគ្រោះ ក៏មិនចាប់អារម្មណ៍ បានមួយភ្លែត ក្រោយមក ក៏ស្រាប់តែឃើញជនសង្ស័យ កាន់កាប់បិតខ្វែវ ទៅកាប់លើជនរងគ្រោះ។ ពេលនោះ ជនរងគ្រោះ ក៏យកដៃរង ហើយរត់ហៅគេឱ្យជួយ តែជនសង្ស័យ នៅតែបន្តរត់តាម កាប់សម្លាប់ជន រងគ្រោះ ចំនួន ៥ កាំបិត រហូតដល់ស្លាប់។
ជនសង្ស័យ ត្រូវបានបញ្ជូនមកបញ្ជាការដ្ឋាន អាវុធហត្ថ ខេត្តព្រះវិហារ ដើម្បីសាកសួរ និងចាត់ការ តាមផ្លូវច្បាប់ ៕
