Face Of Cambodia ចម្រាញ់បានបេក្ខភាព ស្រី១២នាក់ និងប្រុស១២នាក់ ត្រៀមវគ្គផ្ដាច់ព្រ័ត្រថ្ងៃ ២៤ ខែកក្កដា ខាងមុខនេះ!

ក្រោយឆ្លងកាត់ការជ្រើសរើស និងវាយតម្លៃយ៉ាងយកចិត្តទុកដាក់នៅទីបំផុតកម្មវិធី The Face Of Cambodia ២០២២ ចម្រាញ់បានបេក្ខភាពស្រី ១២នាក់ និងប្រុស១២នាក់ ដើម្បីបន្តទៅកាន់វគ្គផ្ដាច់ព្រ័ត្រធ្វើឡើងទៅថ្ងៃទី ២៤ ខែកក្កដា ឆ្នាំ២០២២ ខាងមុខនេះនៅ អូឡាំព្យាស៊ីធី។
លោក ម៉ែន និមលរតន៍ អ្នកចាត់ការទូទៅកម្មវិធី Face Of Cambodia បានបង្ហាញពីភាពរីករាយក្រោយកម្មវិធីចម្រាញ់បានបេក្ខភាពទាំង២៤នាក់ចុងក្រោយ ដែលសុទ្ធសឹងតែមានសម្រស់ស្រស់ស្អាត និងមានសមត្ថភាពធ្វើឱ្យកម្មវិធីប្រកួតនៅសប្ដាហ៍ក្រោយនេះនឹងកាន់តែស្វិតស្វាយ។
លោកមានជំនឿជាក់ថានឹងអាចជ្រើសរើសបេក្ខភាពដ៏ស្រស់ស្អាត និងមានសមត្ថភាពដើម្បីបោះជំហានទៅកាន់ឆាកអន្តរជាតិក្នុងពេលឆាប់ៗខាងមុខ។

យ៉ាងណាក៏ដោយលោកបានអះអាងថាកម្មវិធី The Face Of Cambodia នេះគឺផ្ដោតខ្លាំងលើតារាបង្ហាញម៉ូដអាជីព ដូច្នេះសម្រាប់បេក្ខជន បេក្ខនារីចង់ក្លាយជាតារាបង្ហាញម៉ូដបែបអាជីពនោះពិតជាមិនខុសបំណងទេ។
លោកបានបន្តថាឆ្នាំនេះ កម្មវិធីប្លែក និងទាក់ទាញជាងឆ្នាំកន្លងទៅ ព្រោះរយៈពេល ២ឆ្នាំកន្លងមកនេះកម្មវិធីគឺប្រកួតតែតាមអនឡាញប៉ុណ្ណោះ ដោយសារវិបត្តិនៃជំងឺកូវីដ១៩។
សម្រាប់ឆ្នាំដ៏ពិសេសនេះដែរសារព័ត៌មាន ក្បោះក្បាយ បានក្លាយជាដៃគូសហការជាមួយកម្មវិធី The Face Of Cambodia នេះដើម្បីធ្វើយ៉ាងណាឱ្យកម្មវិធីកាន់តែមានភាពទូលំទូលាយេះ ក៏ដូចជាការជួយជំរុញលើកកម្ពស់វិស័យបវរកញ្ញានៅ កម្ពុជាឱ្យមានភាពកាន់តែប្រសើរឡើងថែមទៀតតាមរយៈការជួយផ្សព្វផ្សាយទៅកាន់បណ្ដាអ្នកគាំទ្រទាំងក្នុង និងក្រៅប្រទេស។
សូមបញ្ជាក់ថា ការប្រកួកវគ្គផ្ដាច់ព្រ័ត្រកម្មវិធី The Face Of Cambodia នឹងធ្វើឡើងនៅថ្ងៃទី ២៤ ខែកក្កដា ឆ្នាំ២០២២ ខាងមុខនេះនៅផ្សារទំនើប អូឡាំព្យាស៊ីធី។ កុំភ្លេចតាមដានជាមួយសារព័ត៌មាន ក្បោះក្បាយដោយធ្វើការ like and Follow Page ក្បោះក្បាយ-kbors kbay ៕