ផ្លូវល្បឿនលឿន ភ្នំពេញ- ព្រះសីហនុ គ្រោងដាក់ឱ្យប្រើប្រាស់ជាបណ្ដោះអាសន្នក្រោយពិធីបុណ្យភ្ជុំបិណ្ឌរួច!

ឯកឧត្ដម ស៊ុន ចាន់ថុល ទេសរដ្ឋមន្រ្ដី និងជារដ្ឋមន្រ្ដីក្រសួងសាធារណការ និងដឹកជញ្ជូនក្នុងពិធីចុះពិនិត្យមើលវឌ្ឍនភាពផ្លូវល្បឿនលឿនភ្នំពេញ-ព្រះសីហនុនៅព្រឹកថ្ងៃទី១៩ ខែកក្កដា ឆ្នាំ២០២២នេះ មានប្រសាសន៍ថា ក្រោយសម្រេចការសាងសង់៩៥ភាគរយផ្លូវល្បឿនលឿនភ្នំពេញ-ព្រះសីហនុ គ្រោងដាក់ឱ្យដំណើរការប្រើប្រាស់ជាបណ្ដោះអាសន្ន នៅថ្ងៃទី១ ខែតុលា ឆ្នាំ២០២២ នេះពោលគឺនៅក្រោយពិធីបុណ្យភ្ជុំបិណ្ឌប្រពៃណីជាតិរួច។

ផ្លូវល្បឿនលឿនភ្នំពេញ- ព្រះសីហនុ នេះក្រសួងគ្រោងនឹងបើកឱ្យប្រជាពលរដ្ឋធ្វើដំណើរដោយមិនយកកម្រៃ ក្នុងរយៈពេល ១ខែ ដំបូងហើយនឹងធ្វើការផ្សព្វផ្សាយបន្ថែមអំពីនីតិវិធីនៃការប្រើប្រាស់ ផ្លូវល្បឿនលឿន ក៏ដូចជាដាក់បង្ហាញនូវផ្លាកសញ្ញា និងច្បាប់ចរាចរណ៍មួយចំនួនផងដែរ។

ឯកឧត្ដម ស៊ុន ចាន់ថុល បន្តថាក្រសួងសាធារណការ និងដឹកជញ្ជូនបានចូលរួមជាមួយក្រុមហ៊ុនសាងសង់ផ្លូវល្បឿនលឿនភ្នំពេញ ក្រុងសីហនុ ដោយផ្លូវល្បឿនលឿនេះមានចំងាយ ១៨៧គីឡូម៉ែត្រ ហើយមកដល់ពាក់កណ្ដាលខែ កក្កដានេះ ធ្វើបាន៩៥ភាគរយហើយ។ នៅសល់ ៥ភាគរយទៀតទាក់ទងនិងផ្លាកសញ្ញា ដាំដើមផ្កា និងដាក់មេរ៉ា ល និងល ។ដូច្នេះគ្រោងនឹងបញ្ចប់ហើយដាក់ឱ្យប្រើប្រាស់ជាបណ្ដោះអាសន្ននៅថ្ងៃទី១ ខែ១០ ឆ្នាំ២០២២នេះ។
គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧,០៥គីឡូម៉ែត្រ ដែលបានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩ ដែលផ្លូវនេះតភ្ជាប់ពីភូមិ១ សង្កាត់ សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ។

ដោយឡែក គម្រោងផ្លូវល្បឿនលឿនមួយខ្សែនេះ អនុវត្តការសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) ហើយត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD ។
គម្រោងសាងសង់ផ្លូវល្បឿនលឿន-ភ្នំពេញព្រះសីហនុ គឺជាគម្រោងផ្លូវល្បឿនលឿនទី១ និងជាគម្រោងផ្លូវរបៀងយុទ្ធសាស្ត្រសំខាន់បំផុតនៅកម្ពុជា ដែលនឹងជួយកាត់បន្ថយការកកស្ទះចរាចរណ៍ ចំណេញពេលវេលាធ្វើដំណើរ ក៏ដូចជា នឹងជួយកាត់បន្ថយការចំណាយលើតម្លៃប្រេងសាំងផងដែរ។ នេះបើតាមការគូសបញ្ជាក់ពីឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូន៕