ក្រោយពីរបបសឹក មីយ៉ាន់ម៉ា ដោះលែងឱ្យមានសេរីភាព កាលពីពេលថ្មីៗក្រុមការងាររបស់ផលិតកម្ម LD Picture និងផលិតកម្ម Real Bros Production កំពុងញាប់ដៃញាប់ជើងដើម្បីរៀបចំឯកសារនានាដាក់ទៅកាន់រដ្ឋាភិបាល មីយ៉ាន់ម៉ា ដើម្បីឱ្យតារាល្បីឈ្មោះ Paing Takhon អាចមានសិទ្ធចេញមកថតភាពយន្ត Red Wall ជញ្ជាំងក្រហម ក្នុងពេលឆាប់ៗ។
បើតាមអ្នកចាត់ការទូទៅផលិតកម្ម LD Picture លោក លៀក លីណា បានឱ្យដឹងថា តារាសម្ដែង និងជាតារាម៉ូដែលល្បីឈ្មោះរបស់ មីយ៉ាន់ម៉ា ខាងលើបានត្រៀមខ្លួនរួចរាល់អស់ហើយ ដើម្បីមកថតបញ្ចប់ស្នាដៃថ្មីរបស់គេជាមួយតារាម៉ូដែលខ្មែរ និងជាម្ចាស់មកុដ Miss Grand Cambodia 2021 កញ្ញា ប៉ូ គីមថេងសុតធីតា នាពេលដ៏ខ្លីខាងមុខ។
អ្នកចាត់ការទូទៅរូបនេះបានបង្ហាញពីក្ដីសប្បាយរីករាយនៅពេលឃើញ Paing Takhon មានសេរីភាពឡើងវិញ និងអាចបន្តសកម្មភាពការងារសិល្បៈរបស់ខ្លួនជាធម្មតាឡើងវិញ ទាំងការងារម៉ូដែល និងការថតភាពយន្ត។ ជាពិសេសស្នាដៃថ្មីរបស់លោកគឺរឿង” Red Wall” ដែលផលិតដោយក្រុមការងារផលិតកម្ម LD Picture តែម្ដង។
លោក លៀក លីណា មានក្ដីរំពឹងខ្ពស់ថារដ្ឋាភិបាល មីយ៉ាន់ម៉ា នឹងអនុញ្ញាតិឱ្យតារាល្បីឈ្មោះរបស់ខ្លួនរូបនេះចេញក្រៅប្រទេស ដើម្បីអាចបន្តថតភាពយន្តបាន ព្រោះតែលោកយល់ថាទំនាក់ទំនងរវាង មីយ៉ាន់ម៉ា និងកម្ពុជា មានភាពល្អប្រសើរទាំងប្រពៃណី វប្បធម៌ សេដ្ឋកិច្ច និងនយោបាយ ព្រមទាំងប្រជាជនប្រទេសទាំងពីរ។
បើអ្វីៗគ្រោងទៅតាមការកំណត់មែននោះ ស្នាដៃខ្នាតធំដំបូងដែលសហការជាមួយផលិតកម្ម បរទេស ដែលចាយទុនជាង ១លានដុល្លារ នឹងអាចមានដំណើរការរលូត ហើយទទួលបានជោគជ័យខ្ពស់នាពេលខាងមុខ។
Paing Takhon អាចនិយាយថាជានិមិត្តរូបម្នាក់របស់ប្រជាជន មីយ៉ាន់ម៉ា ក៏ថាបានព្រោះនៅក្នុងពិភពសិល្បៈរបស់ប្រទេសមីយ៉ាន់ម៉ា លោក Paing Takhon ជាតារាភាពយន្ត តារាបង្ហាញម៉ូត និងតារាចម្រៀង។ នៅក្នុងផ្នែកពាណិជ្ជកម្មវិញ តារាភាពយន្តមីយ៉ាន់ម៉ារូបនេះ ជាម្ចាស់ភាគហ៊ុនធនាគារឯកជន និងជាស្ថាបនិកក្រុមហ៊ុនគ្រឿងសំអាង របស់ប្រទេសតំបន់អាស៊ីអាគ្នេយ៍ឬហៅកាត់ថាអាស៊ានមួយនេះ។
បើក្រឡេកមើលទៅផ្នែកនយោបាយវិញ តារាភាពយន្តវ័យក្មេង លោក Paing Takhon កើតនៅខែកញ្ញា ឆ្នាំ១៩៩៦ រូបនេះជាសកម្មជននយោបាយប្រជាធិបតេយ្យដ៏សកម្មម្នាក់នៅប្រទេសមីយ៉ាន់ម៉ា។ លោក Paing Takhon មានទីកំណើតនៅប្រទេសមីយ៉ាន់ម៉ា ជាកូនទី៤ក្នុងចំណោមបងប្អូន៦នាក់ មានបងប្រុសម្នាក់ បងស្រី២នាក់ និងប្អូនប្រុស២នាក់។ លោកបានចាប់ផ្តើមកសាងកេរ្តិ៍ឈ្មោះក្នុងពិភពសិល្បៈមីយ៉ាន់ម៉ា ជាតារាបង្ហាញម៉ូត។
នៅឆ្នាំ២០១៤ Takhon លោកបានចូលរៀនដើរបង្ហាញម៉ូត និងបានចាប់យកអាជីពជាតារាបង្ហាញ ម៉ូត។ រូបសម្បត្តិស្រស់សង្ហា ទេពកោសល្យ និងឱកាស បានរុញច្រានបុរសមីយ៉ាន់ម៉ារូបនេះ ទទួលបានការងារជាច្រើន មានថតផ្សព្វផ្សាយពាណិជ្ជកម្ម និងការដើរបង្ហាញម៉ូតលើវេទិកាធំៗរាប់មិនអស់ និងជាតារាក្របមុខទស្សនាវដ្តីជាច្រើន។ បន្ទាប់មកវត្តមានរបស់លោកបានបង្ហាញនៅលើកញ្ចក់ទូរទស្សន៍ក៏ត្រូវបានបង្ហាញឡើងតាមរយៈស្នាដៃការងារជាតារាផ្សព្វផ្សាយពាណិជ្ជកម្ម ហើយក៏បានឈានជើងចូលថតវីដេអូបទចម្រៀង។
ការខិតខំប្រឹងប្រែបំពេញការងារឥតឈប់ឈរ ជាតារាបង្ហាញម៉ូត និងភាពល្បីល្បាញខ្លាំងជាតារាថតផ្សព្វផ្សាយពាណិជ្ជកម្មធ្វើអោយវិស័យឧស្សាហកម្មភាពយន្តចាប់អារម្មណ៍លើរូបលោកយ៉ាងខ្លាំង ដូច្នេះហើយឱកាសថតភាពយន្តជាច្រើនក៏បានរត់ចូលមករកលោកជាបន្ត បន្ទាប់និងមានអ្នកគាំទ្រទាំងក្នុងស្រុកនិងក្រៅស្រុក។
លោក Paing Takhon ស្ថិតនៅក្នុងចំណោមប្រជាជនមីយ៉ាន់ម៉ាតែប៉ុន្មាននាក់ប៉ុណ្ណោះ ដែលជាប់ឈ្មោះល្បីល្បាញនៅក្រៅប្រទេស។ នៅឆ្នាំ២០១៩ លោក Paing Takhon បានជាប់ឈ្មោះក្នុងបញ្ជីតារាភាពយន្តកំពូលទាំង១០ Top 10 Actors របស់ទស្សនាវដ្តី The Myanmar Times ។
ទាក់ទងនឹងជីវិតផ្ទាល់ខ្លួនវិញ តារាភាពយន្តមីយ៉ាន់ម៉ាលោក Paing Takhonរូបនេះ នៅមិនទាន់មានដំណឹងពីរឿងជីវិតស្នេហានៅឡើយទេ។
លោក PaingTakhon ធ្លាប់ចេញគម្រោងធ្វើដំណើរមកកាន់ប្រទេសកម្ពុជាកាលពីដើមឆ្នាំ២០២០មកម៉្លេះ ប្រយោជន៍ថតភាពយន្តខ្នាតធំដែលស្ថិតក្រោមកិច្ចសហការរវាងផលិតកម្មLD Picture និងផលិតកម្មមួយនាប្រទេសមីយ៉ាន់ម៉ា គឺរឿង” នាឡិកាដាស់វិញ្ញាណវគ្គ២” ឬ The Clock Red Wall ក៏ប៉ុន្តែបានជាប់គាំង។ ទើបតែថ្មីៗនេះទៀតទេដែលដំណឹងនៃការមកប្រទេស កម្ពុជាដើម្បមកថតស្នាដៃថ្មីរបស់លោកលេចរូបរាងម្ដងទៀត៕