រដ្ឋបាលព្រៃឈើនៃក្រសួងកសិកម្ម បានអះអាងតាមរយៈលិខិតមួយបានឱ្យដឹងថា ការដែលរដ្ឋាភិបាលសម្រេចយកតំបន់ភ្នំតាម៉ៅ សម្រាប់ធ្វើការអភិវឌ្ឍគឺមិនមែនជាការដោះដូរអ្វីនោះទេ ប៉ុន្តែគឺជាការជួយកែលម្អឧទ្យានសួនសត្វភ្នំតាម៉ៅឱ្យប្រសើរឡើង។ ម្យ៉ាងទៀតដោយសារតែតំបន់នោះនៅក្បែរទីក្រុង ក្បែរព្រលានយន្តហោះថ្មី និងកៀកតំបន់ទេសចរណ៍បាទី ខណៈតំបន់នោះពោរពេញដោយដីខ្សាច់ ព្រៃឈើមិនមានការលូតលាស់ល្អ និងពុំមានសត្វព្រៃសំខាន់ៗនោះទេ។
ការអះអាងរបស់រដ្ឋបាលព្រៃឈើ បានធ្វើឡើងក្រោយពីមានសាធារណជនជាច្រើនបង្ហាញចម្ងល់អំពីស្ថានភាពព្រៃឈើនៅភ្នំតាម៉ៅ ខណៈពួកគេមួយចំនួនបានប្រកាសពីការធ្វើពហិការមិនប្រើប្រាស់សេវាកម្ម និងផលិតផលរបស់ក្រុមហ៊ុនដែលវិនិយោគ ដែលធ្វើឱ្យបាត់បង់ព្រៃឈើ និងជម្រកសត្វព្រៃនៅតំបន់ភ្នំតាម៉ៅ។
សេចក្តីប្រកាសព័ត៌មានរបស់រដ្ឋបាលព្រៃឈើ ចុះថ្ងៃទី០៤ ខែសីហា ឆ្នាំ២០២២ បានលើកឡើងថា៖ «ការអភិវឌ្ឍតំបន់នេះមិនមែនជាការលក់ដូរដូចការលើកឡើងនោះទេ តែជាការដោះដូរតំបន់នេះជាថ្នូរនឹងការអភិវឌ្ឍបន្ថែមដល់ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដោយកែលម្អឧទ្យានសួនសត្វភ្នំតាម៉ៅឱ្យមានភាពប្រសើរឡើង»។
រដ្ឋបាលព្រៃឈើបន្តថា ករណីនេះហើយបានជារដ្ឋាភិបាលសម្រេចយកតំបន់នេះសម្រាប់ធ្វើការអភិវឌ្ឍ មិនមែនជាការលក់ដូរនោះទេ ខណៈតំបន់នោះស្ថិតនៅក្បែរទីក្រុង ក្បែរព្រលានយន្តហោះថ្មី និងកៀកតំបន់ទេសចរណ៍ទន្លេបាទី។
រដ្ឋបាលព្រៃឈើ បញ្ជាក់ថា៖”ការអភិវឌ្ឍតំបន់នេះមិនមែនជាការលក់ដូរដូចការលើកឡើងនោះទេ តែជាការដោះដូរតំបន់នេះជាថ្នូរនឹងការអភិវឌ្ឍបន្ថែមដល់ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដោយកែលម្អឧទ្យានសួនសត្វភ្នំតាម៉ៅឱ្យមានភាពប្រសើរឡើង»។
រដ្ឋបាលព្រៃឈើដដែលបានបញ្ជាក់ទៀតថា តំបន់ភ្នំតាម៉ៅ ក៏ពុំមានសត្វព្រៃសំខាន់ៗជិតផុតពូជ និងសត្វកម្រនោះដែរ ខណៈតំបន់នេះតែងមានសត្វជ្រូកព្រៃមករំខានដល់ដំណាំប្រជាពលរដ្ឋ។ រដ្ឋបាលព្រៃឈើបន្តថា សត្វព្រៃដែលបានលើកឡើងកន្លងមក ជាសត្វព្រៃបានថែរក្សានៅក្នុងឧទ្យានសួនសត្វភ្នំតាម៉ៅ ដែលមានសុវត្ថិភាព១០០ភាគរយ លើផ្ទៃដីហ៊ុមព័ទ្ធដោយរបងជិតជាង៤០០ហិកតា ដែលករណីនេះមានន័យថា ការអភិវឌ្ឍនេះមិនមានការប៉ះពាល់ទាល់តែសោះដល់ជម្រកសត្វព្រៃ៕
