អតីតតារាកំប្លែងល្បីឈ្មោះ ខ្ញុង បានព្រលយពាក្យសម្ដីថានាងមិនចង់វិលចូលសិល្បៈវិញនោះទេ បើទោះជាមានអ្នកអញ្ចើញថតភាពយន្ត ឬកម្មវិធីផ្សេងៗក៏ដោយ។ ទាំងនេះដោយសារតែអ្នកនាងយល់ថាអ្នកប្រកបអាជីពនេះដូចគ្នាបានមើលងាយមើលថោកនាង និងស្វាមីជាខ្លាំងអំឡុងពេលមានបញ្ហាកាលពីពេលថ្មីៗ។
ឆ្លើយតបពាក្យមហាជនមួយចំនួនបានចោទសួររឿងវិលត្រឡប់ចូលសិល្បៈជាថ្មី អតីតតារាកំប្លែងរបស់ CTN រូបនេះបានបញ្ជាក់ថា៖”យាយត្រង់បងប្អូនចិត្តខ្ញុំចង់ចេញពីសិល្បៈតែម្ដង ព្រោះអីខ្ញុំមិនចង់ឱ្យបងប្អូនសិល្បៈយើងមួយចំនួនគាត់មានអារម្មណ៍ថាយើងធ្វើឱ្យថោកដល់ពួកគាត់”។
តារាកំប្លែងល្បីឈ្មោះខាងលើបន្តថា ការលើកឡើងដូច្នេះមិនមែនមានម័យថានាងស្អប់សិល្បៈ ដោយមានការងារឱ្យធ្វើហើយមិនធ្វើ ខណៈខ្លួនកំពុងជាប់ផុងក្នុងបំណុលគេនៅឡើយ ពោលគឺមិនចង់លេចលឺថាខ្លួន និងស្វាមីធ្វើឱ្យតម្លៃសិល្បៈខ្មែរធ្លាក់ចុះព្រោះតែពួកគេទាំងពីរនាក់។
ខ្ញុង ក៏បានថ្លៃអំណរគុណដល់បណ្ដាផលិតករនានា ឬក្រុមកំប្លែងផ្សេងៗបានទាក់ទងនាង និងស្វាមីឱ្យចូលបម្រើសិិល្បៈវិញ ដែលជាទឹកចិត្តមួយបង្ហាញពីការស្រលាញ់ និងចូលចិត្តព្រមទាំងផ្ដល់តម្លៃក្នុងនាមអ្នកប្រកបអាជីពនេះដូចគ្នា។
យ៉ាងណាពាក្យពេចន៍រិះគន់ និងការមើលងាយពីបណ្ដាសិល្បករមួយចំនួនធ្វើឱ្យនាងឆ្អែតចិត្ត លែងចង់ប្រកបអាជីពនេះបន្តទៅទៀត ទោះជាពេលនេះនាងកំពុងតែស្វះស្វែងដើម្បីរកប្រាក់តាមមធ្យោបាយផ្សេងៗដោះបំណុលគេក្ដី។
តារាកំប្លែងល្បីឈ្មោះមានឈ្មោះដើមថា ស្រេង សុកាន់ដា បានសង្កត់ធ្ងន់ថា បច្ចុប្បន្ននាង និងស្វាមីកំពុងតែស្វះស្វែងរកប្រាក់តាមរយៈការ live លក់ផ្អក់ ប្រហុក ត្រីងៀត ជាដើមដើម្បីបានប្រាក់កាសមួយចំនួនផ្គត់ផ្គង់គ្រួសារ ហើយមួយចំនួនទៀតសម្រាប់ដោះស្រាយបន្ទុកបំណុលរបស់គេ។
សូមបញ្ជាក់ថាស្វាមីអ្នកនាង ខ្ញុង នាយ កៃដរ ទើបតែចេញពីមន្ទីរពេទ្យកាលពីពេលថ្មីៗតែប៉ុណ្ណោះ បន្ទាប់ពីលោក និងភរិយា ពេលកំពុង live លក់ផលិតផលស្រាប់តែលោកវៀចមាត់វៀច ក រហូតដឹកទៅកាន់មន្ទីរពេទ្យ ហើយមកទល់នឹងពេលនេះលោកមានសភាពធម្មតាឡើងវិញហើយ៕
