តារាចម្រៀងល្បីឈ្មោះ និងទើបតែចែកផ្លូវគ្នាជាមួយអនិកជនខ្មែរ អូស្ត្រាលីលោក គីម ហាន ដែលធ្វើឱ្យនាងក្លាយជាស្ត្រីមេម៉ាយ បានផ្ដាំទៅកាន់បុរសៗដែលចង់ចូលក្នុងបេះដូងនាងថាគយរកុំធ្វើរឿងនេះប្រសិនចង់បង្ហាញពីស្នេហ៍ស្មោះមកកាន់នាងពិតមែន។
តាមរយៈបណ្ដាញសង្គមអតីតតារាចម្រៀងរបស់ផលិតកម្ម M រូបនេះបានសរសេរសារខ្លីថា៖”ធ្វើអីធ្វើទៅ កុំតែមកបោកចិត្តអ្នកមេម៉ាយទៅបានហើយ”។
សារខ្លីនេះទំនងជា តារាល្បីឈ្មោះរូបនេះខ្លាចជួបរឿងរាវជាន់ដានចាស់ដូចដែលនាងបានចែកផ្លូវគ្នាដើរជាមួយលោក គឹម ហាន កាលពីពេលថ្មីៗដូច្នេះដែរ។
មួយរយៈមកហើយដែលតារាចម្រៀងស្រីរាងតូចច្រឡឹង ពេជ្រ សូលីកា រស់នៅស្ពាយឈ្មោះជាស្រ្តីមេម៉ាយកូនមួយយ៉ាងពេញលេញ បន្ទាប់អតីតគូស្នេហ៍នាងបានប្រកាសប្រាប់សាធារណជនថា ចំណងស្នេហ៍របស់ពួកគេបានបញ្ចប់ទៅហើយ។
បន្ទាប់ពីជីវិតគ្រួសារបានដើរដល់ផ្លូវបំបែកភ្លាមៗ វាហាក់វាយប្រហារផ្លូវចិត្ត ពេជ្រ សូលីកា ជាខ្លាំង ដោយកាលនោះនាងតែងនិយាយជាមួយអ្នកគាំទ្រនៅលើ Story របស់ខ្លួនថា មួយរយៈចុងក្រោយនេះនាងគិតច្រើនសម្រាកមិនសូវបានឡើយ។
ដ្បិតថារឿងរ៉ាវកើតឡើងលើកនេះ អ្នកម៉ាក់កូនមួយខាងលើហាក់រងនូវសម្ពោធផ្លូវចិត្តយ៉ាងខ្លាំង ប៉ុន្ដែតារាស្រីរូបនេះធ្វើឱ្យមហាជនកោតសរសើរពីភាពរឹងមាំរបស់នាងជាខ្លាំងដូចគ្នា ដោយនាងនៅតែបន្តក្រោកឈរ តាំងជំហររកលុយចិញ្ចឹមជីវិត មើលថែកូនប្រុស និង ប្អូនស្រីយ៉ាងល្អមិនឱ្យពួកគេខ្វះភាពកក់ក្ដៅឡើយ។
តារាចម្រៀងល្បីឈ្មោះខាងលើកំពុងផ្ដើមសកម្មភាពការងារសិល្បៈជាខ្លាំងពីមួយថ្ងៃទៅមួយថ្ងៃ ជាពិសេសក្រោយការចែកផ្លូវគ្នាជាមួយគូស្នេហ៍។ ជាក់ស្ដែងកាលពីពេលថ្មីៗនេះ ពេជ្រ សូលីកា បានផ្ដើមមសកម្មភាពក្នុងនាមជាទូតសុឆន្ទៈឱ្យផលិតផលកែសម្ផស្សមួយ ដោយទទួលបានតម្លៃខ្លួនដ៏ខ្ពស់មួយ រួមនឹងការពង្រឹងអាជីពសិល្បៈកាន់តែខ្លាំងឡើងវិញ។
សូមបញ្ជាក់ថា ក្រោយចែកផ្លូវគ្នាដើរដោយស្ងប់ស្ងាត់ជាមួយស្វាមីជាអាណិកជនខ្មែរ-អូស្ត្រាលី គីម ហាន ពេជ្រ សូលីកា ហាក់បាក់ទឹកចិត្ត និងចង់គិតខ្លីម្ដងៗ។ ក៏ប៉ុន្តែបន្ទាប់ពីធ្វើចិត្តបានពេលនេះតារាល្បីឈ្មោះខាងលើផ្ដើមសកម្មភាពការងាររបស់ខ្លួនឡើងវិញទាំងទីផ្សារជំនួញ និងសិល្បៈ៕