បទចម្រៀងលោក ឆាយ វីរៈយុទ្ធ នាពេលចុងក្រោយនេះមិនសូវមានចេញជាហូរហែ និងផ្ទុះខ្លាំងដូចកាលពីប៉ុន្មានឆ្នាំមុនទេ។ បញ្ហានេះមិនបានធ្វើឱ្យលោក ឆាយ វីរៈយុទ្ធ ព្រួយបារម្ភនោះទេ ផ្ទុយទៅវិញលោកបែរជាញញឹមសប្បាយរីករាយតៅវិញនៅពេលទីផ្សាររបស់លោកនៅតែមានហាងឆេងខ្ពស់ដដែល។
រាល់ពេលបទចម្រៀងរបស់តារាល្បីឈ្មោះរូបនេះ ចេញនៅលើទីផ្សារម្តងៗតែងតែទទួលបានការគាំទ្រខ្លាំងពី ទស្សនិកជនជាពិសេសបទចម្រៀងមនោរសញ្ចេតនា ពីព្រោះលោកគឺជាតារាចម្រៀងម្នាក់ដែលមានទឹកដមសម្លេងល្អខាងផ្នែកមនោរសញ្ចេតនាជាងបទចម្រៀងញាក់កន្រ្តាក់អារម្មណ៍។
ដោយឡែកនៅក្នុង ឆ្នាំ ២០២២ នេះថ្វីដ្បិតតែបទចម្រៀងឈានមុខរបស់ផលិតកម្ម សាន់ដេ មានចេញជាហូហែរ តែនៅពុំទាន់មានបទចម្រៀងថ្មីណាអាចទាក់បេះដូងយុវវ័យ ឱ្យចាប់អារម្មណ៍ខ្លាំងក្លាដូចកាលពីមុនទេ ។
ទោះបីជាមិនមានបទចម្រៀងថ្មីទាក់អារម្មណ៍ទស្សនិកជន ប៉ុន្តែលោក នៅតែជាតារាចម្រៀងលេចធ្លោម្នាក់ និងទទួលបានការគាំទ្រខ្លាំងពីទស្សនិកជន ហើយលោកកាន់តែមមាញឹកខ្លាំង នៅក្នុងការកើបលុយចេញច្រៀងតាមខនសឺតរបស់ក្រុមហ៊ុនធំៗ និងច្រៀងតាមពិធីមង្គលការនានា ។
លោក ឆាយ វីរៈយុទ្ធ នៅតែនិយាយថា បទចម្រៀងលោកមានចេញជាហូរហែ លោកនៅតែរំពឹងថា ទស្សនិកជននៅតែគាំទ្រស្នាដៃថ្មីរបស់ខ្លួន ។
លោក ឆាយ វីរៈយុទ្ធ មិនត្រឹមតែអាចរកប្រាក់ចំណូលបានយ៉ាងខ្ពស់ពីអាជីពចម្រៀងប៉ុណ្ណោះទេ លោកថែមទាំងមានមុខជំនួញជាច្រើននៅក្នុងដៃ ជាក់ស្តែងចាប់តាំងពីរៀបការរួច លោកបានពង្រើក អាជីវកម្មជាច្រើនរបស់ខ្លួនរួមជាមួយនិងភរិយា រហូតទទួលបានការកោតសរសើរយ៉ាងខ្លាំងពីមហាជន ថា លោកគឺជាតារាចម្រៀងវ័យក្មេងដ៏មានអនាគត ៕
