ក្រុមតារាចម្រៀងល្បីៗ និងតន្ត្រីផងនោះបានបង្ហាញពីការសោកស្ដាយជាខ្លាំងបន្ទាប់លោក គង់ ពិសិដ្ឋ ដែលជាអ្នកនិពន្ធបទភ្លេងដ៏ល្បីឈ្មោះម្នាក់បានជួយជ្រោមជ្រែងតារាមួយចំនួនធំមានភាពល្បីល្បាញដូចសព្វថ្ងៃ បានទទួលមរណភាពដោយរោគាពាធកាលពីពេលថ្មីៗ។
តារាចម្រៀងល្បីឈ្មោះ និងមានងារជាឧកញ៉ា ខេមរៈ សិរីមន្ត បានបង្ហាញពីការសោកស្ដាយជាខ្លាំងចំពោះអ្នកនិពន្ធល្បឈ្មោះរូបនេះ ដោយក្នុងនោះអ្នកពន្ធរូបនេះក៏ធ្លាប់ជួយលោកបានច្រើនផងដែរក្នុងមានជាអ្នកពន្ធបទល្បីៗឱ្យមួយចំនួន។ ប្រការបែបនេះហើយទើបលោកប្រកាសឱ្យសិល្បករ សិល្បការិនីជួយចូលបុណ្យសពអ្នកនិពន្ធរូបនេះ ក្នុងនោះឧកញ៉ារូបនេះក៏បានចូលបុណ្យ4លានរៀលផងដែរ។
ឧកញ៉ា ខេមរៈ សិរីមន្តបន្តថា បងប្រុស គង់ ពិសិដ្ធ ជាគ្រូភ្លេង និងសម្រួលតន្រ្តី ហើយតារាស្រុកយើងល្បីច្រើនណាស់ដោយសារគាត់ ហើយសង្ឃឹមថា ដំណឹងមរណៈនេះនឹងលេចលឺដល់សិស្ស និងសិល្បករដទៃទៀតចង់ចូលរួមរំលែកទុក្ខជាមួយគ្រូសារគាត់
ដោយឡែកសម្រាប់តារាល្បីឈ្មោះប្រចាំផលិតកម្មសាន់ដេលោក ឆាយ វីរៈយុទ្ធ បានលើកឡើងថា៖”ខ្ញុំមិនទាន់បានទៅសួរសុខទុក្ខបងផង បងទៅចោលខ្ញុំបាត់ ខ្ញុំបានឃើញដំណឹងនេះកាលពីម្សិលមិញតាមរយៈPageប្អូនស្រី សុខ ពិសី ឃើញបងឈឺធ្ងន់តែខ្ញុំជាប់សម្តែងនៅខេត្តបាត់ដំបង ខ្ញុំបានទូរសព័្ទមកប្រពន្ធខ្ញុំភ្លាមរៀបចំទៅសួរសុខទុក្ខបងពេលខ្ញុំត្រលប់ពីខេត្តវិញ តែខ្ញុំមិនទាន់ទាំងដល់ភ្នំពេញផងដំណឹងមរណៈភាពរបស់បងត្រូវបានបងប្អូនសិល្បៈយើងផ្សាយពេញFacebook ខ្ញុំពិតជាសោកស្តាយណាស់ដែលមិនបានជួបមុខបងជាលើកចុងក្រោយ ប្អូនសូមចូលរួមរំលែកទុក្ខសូមអោយវិញ្ញាណក្ខន្ធរបស់បងបានទៅដល់ទីស្ងប់សុខ”។
សម្រាប់តារាចម្រៀងល្បីឈ្មោះកញ្ញា សុខ ពិសី បានបង្ហាញអារម្មណ៍សោកស្ដាយជាពន្ធពេកក្រោយទទួលដំណឹងពីមរណភាពរបស់អ្នកនិពន្ធល្បីឈ្មោះរូបនេះដែលតែងតែជួយជ្រោមជ្រែងកញ្ញានាពេលកន្លងមកតាមរយៈការនិពន្ធបទចម្រៀងមួយចំនួនឱ្យខ្លួនមានភាពល្បីឈ្មោះដល់ពេលបច្ចុប្បន្ន។ ក្នុងនោះកញ្ញាក៏បានចូលថវិកា ២លានរៀលផងដែរ បើទោះជានាងមិនទាន់បានទៅចូលបុណ្យផ្ទាល់ក្ដី ខណៈកញ្ញាកំពុងនៅប្រទេសថៃជូនលោកឪពុកប្អូនមកពិនិត្យសុខភាព និងព្យាបាលជំងឺ។
រីឯលោក សួន ពិសិដ្ឋ ដែលជាតន្ត្រីករផ្នែកនិពន្ធបទភ្លេចដូចគ្នា ហាក់មិនជឿលើមរណភាពនេះទេ ព្រោះតែវាលឿនពេកសម្រាប់លោកដែលមិនអាចទទួលយកបាន។
លោកបាននិយាយប្រវត្តិត្រួសៗថា លោក គង់ ពិសិដ្ឋ គឺជាក្លើ ជាង ៣០ឆ្នាំ ជាមិត្តរួមថ្នាក់រួមសាលា មហាវិទ្យាល័យតូតន្រ្តី នៃសកលវិទ្យាល័យភូមិទ្ទវិចិត្រសិល្បៈ ជាផលិតករ អ្នកតែងនិពន្ធបទភ្លេងដែលមានស្នាដៃបទចម្រៀងពិរោះៗល្បីៗជាច្រើននិងធ្វើឱ្យមានតារាចម្រៀង និងកំពូលតារាចម្រៀងល្បីល្បាញច្រើនរូបក្នុងវិស័យសិល្បៈតន្រ្តីនិងភាពយន្ដ នៅក្នុងប្រទេសកម្ពុជា គាត់បានចែកឋានលាយើងទាំងអស់គ្នាជារៀងរហូតហើយ។
គាត់គឺជាបុគ្គលគំរូដ៏ល្អសម្រាប់ធនធានមនុស្សល្អក្នុងសង្គមជាតិ ជាមនុស្សល្អមានចិត្តទូលំទូលាយ ចូលចិត្តកំប្លែងលេងធ្វើឱ្យគេគ្រប់គ្នារីករាយសប្បាយចិត្ត មានមេត្តាធម៌ខ្ពស់ចូលចិត្តជួយគេជួយឯងគ្រប់ៗគ្នាដោយមិនរំពឹងការតបស្នងសងគុណ សាងតែសេចក្ដីល្អ អំពើរល្អ សាងតែបុណ្យកុសល៕
