ខណៈបេក្ខភាពលេចធ្លោ លឹម តិចម៉េង កាលពីយប់មិញបានបោះជំហានទៅកាន់វគ្គផ្ដាច់ព្រ័ត្រនាសប្ដាហ៍ក្រោយ អតីតតារាសម្ដែងល្បីឈ្មោះអ្នកនាង គឹម លីហ្សា បានសន្យាថានឹងធ្វើរឿងមួយគួរឱ្យភ្ញាក់ផ្អើលប្រសិនបើបេក្ខភាពរូបនេះអាចលើកពាន Cambodian Idol រដូវកាលទី៤នេះបាន។
លើបណ្ដាញសង្គម Facebook របស់ខ្លួន អតីតតារាសម្ដែងកំពុងជោគជ័យលើអាជីវកម្មផ្ទាល់ខ្លួនរូបនេះបានបញ្ជាក់ថា៖”កុំឱ្យចែខកបំណងណា idol ចែភ្នាល់ជាមួយកូនចៅជប់លៀង 3 យប់ 3 ថ្ងៃផងវើយ អាដែងអើយចែចាំជប់លៀងឱ្យ ចែ Team លីម តិចម៉េង and you?»
តារារូបនេះបានបង្ហាញការពេញចិត្តជាខ្លាំងចំពោះ បេក្ខជន លីម តិចម៉េង ដែលអ្នកនាង ថែមទាំងបង្ហាញការរំពឹងខ្ពស់ថាបបេក្ខភាពបេក្ខជនឆ្នើមរូបនេះ មានភាគរយខ្ពស់លើកពាននៅវគ្គផ្ដាច់ព្រ័ត្រសប្ដាហ៍ក្រោយបានព្រោះតែសមត្ថភាពលេចធ្លោរបស់គេ។
ក្រៅពីតែតារាសម្ដែង គឹម លីហ្សា យប់មិញនេះម្ដាយរបស់បេក្ខភាពខាងលើក៏បង្កការភ្ញាក់ផ្អើលដល់ទស្សនិកជនផងដែរ ដោយក្រោយការច្រៀងចប់ លោកស្រីបានលើកបាច់ផ្កា ឲ្យកូនប្រុស ហើយ តិចម៉េង ឃើញភ្លាម ក៏រត់ទៅទទួល ហើយលុតជង្គង់សំពះពីលើឆាក ឱបម្ដាយ ដោយក្ដីរំភើប លាយឡំនឹងការភ្ញាក់ផ្អើលបំផុត។
ស្ងាត់ៗ អ្នកម្ដាយបានបង្ហាញមុខ មកគាំទ្រប្រុសច្បងជាទីស្រឡាញ់ ដែលកំពុងស្វិតស្វាញក្នុងការប្រកួត។ កម្លាំងចិត្តដែលម្ដាយផ្ដល់ឲ្យពេលនេះ ពិតជាធំធេងខ្លាំងបំផុត នាំឲ្យ បេក្ខភាពកំលោះតូចរូបនេះ យំទាល់តែបាន លែងខ្មាសទៀតហើយ។
ដោយឡែកងាកមកលទ្ធផលសប្ដាហ៍ថ្មី លីម តិចម៉េង ទទួលបានជាទីពេញចិត្ត តបតាមការខិតខំរបស់ខ្លួន ជាមួយនឹងបេក្ខភាពកំពូល ៣ រូបទៀត មាន នាង ដាវីន, ថុល សុភិទិ និង ស៊ឹម ច័ន្ទពន្លឺ។
រង់ចាំទស្សនានៅសប្ដាហ៍ក្រោយ ដែលជាសប្ដាហ៍នៃវគ្គ ផ្ដាច់ព្រ័ត្រ តើអ្នកណានឹងក្លាយជាម្ចាស់ពាន Cambodian Idol រដូវកាលទី ៤?