កាលពីចុងសប្ដាហ៍មុននេះ YouTuber វ័យក្មេងពីររូបគឺ ហេង វិសាល និង ស្រីនា បានរៀបំពិធីភ្ជាប់ពាក្យរបស់ពួកគេជាផ្លូវការ ដោយផ្ទុះការចាប់អារម្មណ៍ខ្លាំងមែនទែនពីមហាជន។
មានទស្សនិកជនមួយចំនួនស្ទើរមិនជឿហើយប្រដូចពួកគេថាត្រឹមមានឈ្មោះជា TouTuber ប៉ុណ្ណោះតែធ្វើឱ្យមហាជនចាប់អារម្មណ៍ខ្លាំងពិធីមង្គលការ ឬភ្ជាប់ពាក្យរបស់តារាលំដាាប់អាជីពស្រុកខ្មែរមួយចំនួនទៀតផង។
បុរសសង្ហា ហេង វិសាល បានបង្ហាញក្ដីសប្បាយរីករាយនៅពេលក្ដីស្រមៃរបស់ពួកគេបានក្លាយការពិត ដោយក្នុងនេះ Youtuber ល្បីឈ្មោះរូបនេះបានបញ្ជាក់ថា ការភ្ជាប់ពាក្យរបស់ពួកគេជារឿងពិត មិនមែនជាការថត MV ឬសម្ដែងដូចមហាជនមួយចំនួនបានលើកឡើងនោះទេ។
លោក ហេង វិសាល បានបញ្ជាក់ដូច្នេះថា៖” ពួកខ្ញុំទាំងពីរគឺភ្ជាប់ពាក្យមែនទែន ហើយខ្ញុំនិងនា ពិតជាសុំទោសចំពោះការស្ងាត់ មូលហេតុដោយសារពួកខ្ញុំភ័យពេក ពួកខ្ញុំអត់ចង់កុហក ហើយអត់ដឹងធ្វើម៉េច មានតែស្ងាត់ម៉ងទៅ ដោយសារគម្រោងរបស់ពួកយើង គឺចង់បង្ហាញទំនាក់ទំនងរបស់យើងនៅពេលកម្មវិធីចាប់ផ្តើមប៉ុណ្ណោះ»។
Youtuber វ័យក្មេង និងមានឈ្មោះល្បីខាងលើបានថ្លែអំណរគុណជាខ្លាំងសម្រាប់ហ្វេនៗ និងទស្សនិកជននានាបានចូលរួមអបអរសាទរ ក៏ដូចជាការផ្ដល់ក្ដីស្រមាញ់ខ្លាំងសម្រាប់ពួកគេទាំងពីរ។ ក្នុងនោះលោកបញ្ជាក់ថាបើគ្មានការផ្ដល់ក្ដីស្រលាញ់ និងការគាំទ្រពីបងប្អូនទស្សនិកជនទេ នោះពួកគេទាំងពីរមិនអាចមានមុខមាត់ និងកេរ្តិ៍ឈ្មោះល្បីដូចបច្ចុប្បន្ននេះបានទេ។
ដោយឡែកងាកទៅស្រីស្រស់ ស្រីនា វិញក៏មិនសូវខុសគ្នាប៉ុន្មានពីគូស្នេហ៍របស់ខ្លួននោះទេ ដោយកញ្ញាបានបង្ហាញទឹកមុខសប្បាយរីករាយ និងញញឹមបិទមាត់មិនជិតនោះទេចំពោះថ្ងៃជ័យរបស់ខ្លួន។
អ្វីធ្វើឱ្យ YouTuber វ័យក្មេងរូបនេះកាន់តែសប្បាយរីករាយថែមទៀតនោះគឺ ការចូលរួមពីសំណាក់ភ្ញៀវកិត្តិយសនានា ព្រមទាំងការផ្ដល់តម្លៃ និងគាំទ្រពីមហាជននានា ដែលពួកគេទាំងពីរស្ទើរមិននឹកស្មានដល់ពីពិធីភ្ជាប់ពាក្យមួយនេះថាមានអ្នកចាប់អារម្មណ៍ខ្លាំងបែបនេះ។
សូមបញ្ជាក់ថាលោក ហេង វិសាល និងកញ្ញា ស្រីនា គឺជា YouTuber ដ៏ល្បីឈ្មោះ ក្នុងចំណោម YouTuber នានាក្នុងប្រទេស កម្ពុជាដោយពួកគេទាំងពីរគឺជាអ្នកបង្កើតវីដេអូថ្មីៗដោយទទួលការចាប់អារម្មណ៍ជាខ្លាំងពីទស្សនិកជន។ ប្រការដែលមានឈ្មោះល្បីល្បាញផ្នែកបង្កើតវីដេអូថ្មីៗបែបនេះហើយបានធ្វើឱ្យពិធីភ្ជាប់ពាក្យរបស់ពួកគេទាំងពីរម្សិលមិញនេះទទួលការគាំទ្រខ្លាំងមែនទែនពីមហាជន ជាពិសេសគឺមិត្តៗយុវវ័យតែម្ដង៕