ផ្លូវល្បឿនលឿន ភ្នំពេញ-ព្រះសីហនុ ទើបដាក់ដំណើរការសាកល្បងផ្លូវល្បឿនកាលពីដើមខែ តុលា ឆ្នាំ២០២២ កន្លងទៅនេះកំពុងទាក់ទាញការចំណាប់អារម្មណ៍អ្នកទេសចរ ទៅកម្សាន្តខេត្តព្រះសីហនុផុសឡើងខ្លាំងវិញ
ជាក់ស្ដែងកាលពីចុងសប្ដាហ៍មុននេះមានភ្ញៀវទេសចរទៅកម្សាន្តនៅខេត្តមាត់សមុទ្រខាងលើប្រមាណ ១១ម៉ឺននាក់។ នេះបើតាមការបញ្ជាក់ពីរដ្ឋបាលខេត្ត ព្រះសីហនុ។
រដ្ឋបាលខេត្តព្រះសីហនុបានឲ្យដឹងថា តាំងពីការបើកដំណើរឲ្យសាកល្បងផ្លូវល្បឿនលឿនភ្នំពេញ-ព្រះសីហនុ ដោយមិនមានការបង់ប្រាក់ គួបផ្សំទាំងការអភិវឌ្ឍន៍ហេដ្ឋារចនាសម្ព័ន្ធ ការរៀបចំការពារសន្តិសុខ សណ្ដាប់ធ្នាប់ អនាម័យ បរិស្ថាន បានល្អប្រសើរទៀតនោះ បានធ្វើឲ្យខត្តព្រះសីហនុក្លាយជាគោលដៅទាក់ទាញភ្ញៀវទេសចរណ៍ជាតិ និងអន្តរជាតិទៅលេងកម្សាន្តយ៉ាងច្រើនកុះករ។
កំណើននៃភ្ញៀវទេសចរណ៍ នឹងអាចជួយឲ្យសេដ្ឋកិច្ចខេត្តព្រះសីហនុ ក៏ដូចជាប្រជាជនដែលរស់នៅទីនោះ មានការរីកចម្រើនកាន់តែខ្លាំងឡើងៗ។
សូមបញ្ជាក់ថា ផ្លូវល្បឿនលឿន ភ្នំពេញ-ព្រះសីហនុ ដែលមានប្រវែង ១៨៧គីឡូម៉ែត្រ បានបើកដំណើរការសាកល្បងកាលពីថ្ងៃទី១ ខែតុលា ឆ្នាំ២០២២ កន្លងទៅ ដោយមិនគិតប្រាក់រយៈពេលមួយខែពេញ។ ផ្លូវល្បឿនលឿននេះនឹងចាប់ផ្ដើមគិតប្រាក់ពីអ្នកប្រើប្រាស់ផ្លូវពីថ្ងៃទី ១ ខែវិច្ឆិកា ឆ្នាំ២០២២ ខាងមុខនេះ៕