បន្ទាប់ទទួលព័ត៌មានពីប្រជាពលរដ្ឋ ថាមានប្រជាពលរដ្ឋវៀតណាមលួចឆ្លងដែនមកនេសាទត្រីនៅក្នុងទឹកព្រែក ស្ថិតនៅភូមិពោធិតារស់ ឃុំបាសាក់ ស្រុកស្វាយជ្រំ ព្រំដែនកម្ពុជា-វៀតណាម នៅថ្ងៃទី១៨ ខែតុលា ឆ្នាំ២០២២នេះ កម្លាំងសមត្ថកិច្ចខេត្តស្វាយរៀង បានធ្វើការចុះបង្គ្រាបភ្លាមៗ ដោយបានឃាត់ខ្លួនជនជាតិវៀតណាម ចំនួន៧នាក់។
ប្រតិបត្តិការណ៍នេះដែរធ្វើឡើងដោយកម្លាំងជំនាញស្រុកស្វាយជ្រំ សហការជាមួយកម្លាំងប៉ុស្តិ៍នគរបាលរដ្ឋបាលបាសាក់ កម្លាំងប៉ុស្តិ៍នគរបាលច្រកទ្វារ តំបន់ស្រែបារាំង និងកម្លាំងប្រជាការពារ បានចេញប្រតិបត្តិការបង្ក្រាប និងឃាត់ខ្លួនជនជាតិវៀតណាម ដែលលួចឆ្លងដែនដោយខុសច្បាប់ចូលមកនេសាទត្រី ក្នុងទឹកដីកម្ពុជា ចំនួន ៧នាក់ ស្រី ៣នាក់ និងដកហូតបានវត្ថុតាងរួមមាន៖ ទូកម៉ាស៊ីនចំនួន ៤គ្រឿង និងឧបករណ៍នេសាទ មង ចំនួន ៤២ដៃ។
បច្ចុប្បន្នវត្ថុតាងត្រូវបានដកហូតរក្សាទុកនៅប៉ុស្តិ៍នគរបាលរដ្ឋបាលបាសាក់ រីឯជនល្មើសជនជាតិវៀតណាមទាំង ៧នាក់ បានធ្វើកិច្ចសន្យាអប់រំ និងប្រគល់ជូនមន្ត្រីជលផលខេត្ត ធ្វើការផាកពិន័យតាមផ្លូវច្បាប់។ ជាមួយនោះអាជ្ញាធរក៏សូមអរគុណចំពោះបងប្អូនប្រជាពលរដ្ឋ ដែលតែងតែជួយសហការល្អ តាមរយៈការផ្តល់ព័ត៌មានមកអោយសមត្ថកិច្ច ធ្វើឲ្យប្រតិបត្តិការបង្ក្រាបបទល្មើសនាៗ ទទួលបានជោគជ័យ និងមានប្រសិទ្ធិភាពខ្ពស់៕
