កម្មវិធីកំពូលសម្រស់ “Miss and Mister Freshy 2022” បានរៀបចំពិធីបង្ហាញបេក្ខភាពផ្លូវការ ២៤នាក់ចុងក្រោយ មុននឹងកម្មវិធីនេះប្រកួតវគ្គផ្ដាច់ព្រ័ត្រនាចុងខែ តុលា ឆ្នាំ២០២២ ខាងមុខមេះ។ បេក្ខភាពដែលឈ្នះក្នុងកម្មវិធីកំពូលសម្រស់មួយនេះ នឹងទទួលបានរង្វាន់ជាច្រើន រួមទាំងឱកាសចេញទៅប្រកួតនៅក្រៅប្រទេស ថែមទៀត។
លោក ម៉ែន និមលរតន៍ CEO CIM Stars ដែលជាអ្នករៀបចំកម្មវិធីបានថ្លែងទៅកាន់ភ្ញៀវកិតិយស និងបេក្ខភាពទាំង ២៤រូប កាលពីល្ងាចថ្ងៃទី ១៨ ខែតុលា នៅផ្សារទំនើបអូឡាំព្យា ថ្លែងក្នុងពិធីសន្និសិទ្ធសារព័ត៌មានបង្ហាញបេក្ខភាពផ្លូវការនៃការប្រកួត Miss & Mister Freshy 2022 លោក ម៉ែន និមលរតន៍ នាយកប្រត្តិបត្តិក្រុមហ៊ុន CIM បានលើកឡើងថា បេក្ខភាពទាំង២៤នាក់នេះ សុទ្ធតែមានក្តីប្រាថ្នាតែមួយដូចគ្នា គឺចង់គ្រងមកុដក្នុងកម្មវិធី Miss & Mister Freshy 2022 និងតំណាងឱ្យកម្ពុជានៅលើឆាកអន្តរជាតិបន្តទៀត។
នេះ ជាកម្មវិធីថ្មីស្រឡាងមួយដែលរៀបចំឡើងយ៉ាងល្អល្អះល្អិតល្អន់ ដោយរំលឹកឡើងវិញនូវកេរ្តិ៍តំណែលពីដូនតាដ៏ល្អផូរផង់ ប្រកបដោយគុណតម្លៃ រំលេចនូវការប្រកួតឈុតប្រពៃណីជាតិ ៥សម័យកាលផ្សេងៗគ្នា សម្រាប់បេក្ខភាពចំនួន២៥គូរ ដែលបានជម្នះការលំបាក និងមានការប្តេជ្ញា ចិត្តដ៏រឹងមាំ ក្នុងកម្មវិធីប្រកួត មុននិងយើងធ្វើការជ្រើសរើសបាននូវបេក្ខភាពកំពូល១២គូរ ចុងក្រោយនាពេលនេះ។
លោកសង្ឃឹមយ៉ាងមុះមុតថា យើងនឹងអាចរកឃើញនូវជយលាភីដែលជាបវរកញ្ញា និងបុរសឯកអំពីវប្បធម៌ និងប្រពៃណីជាតិ លើកកម្ពស់វិស័យអេកូទេសចរណ៍ និងបន្ត Advocacy នៅក្នុងការងារជួយសង្គម។
សូមជម្រាបថា ការប្រកួតវគ្គផ្តាច់ព្រ័ត្រកម្មវិធី Miss & Mister Freshy 2022 នឹងប្រារព្ធឡើងនៅថ្ងៃទី៣០ ខែតុលា ឆ្នាំ២០២២ ខាងមុខនេះ នៅស្ថានីយ៍ទូរទស្សន៍ទំនើបភីអិនអិន។ ១គូរ ក្នុងចំណោមបេក្ខភាពផ្លូវការទាំង១២គូរ នឹងក្លាយជាម្ចាស់ជយលាភីកម្មវិធីកំពូលសម្រស់ Miss &Mister Freshy 2022។
ជយលាភី ប្រុសម្នាក់ ស្រីម្នាក់ នឹងទទួលបានប្រាក់រង្វាន់តាមចំនួនដែលក្រុមហ៊ុនរៀបចំ មកុដ និង ពានរង្វាន់ ឱកាសក្លាយជា Brand Ambassador ទឹកផ្លែឈើ Freshy ពេញមួយឆ្នាំ រួមទាំងឱកាសតំណាងឱ្យព្រះរាជាណាចក្រកម្ពុជា ទៅចូលរួមប្រកួតកម្មវិធីនៅអន្តរជាតិ និងក្លាយជាតារាកុងត្រាជាមួយក្រុមហ៊ុន CIM រយៈពេល២ឆ្នាំពេញ។ ក្រៅអំពីនោះ ក៏នឹងមានការប្រគល់ជូនពានរង្វាន់ផ្សេងៗទៀតទៅតាមលំដាប់លំដោយនៃការប្រកួតផងដែរ៕