ក្រោយមហាជនសុទ្ធរិះគន់ និងសើចចំអកចំពោះការតុបតែង និងរៀបចំខ្លួនមិនសមជាម្ចាស់ពាន Cambodian Idol រដូវកាលទី៤ លោក លឹម តិចម៉េច បានចេញមុខឆ្លើយតប ដោយលោកបញ្ជាក់ថាមិនមែនចេះតែរៀបចំនោះទេ ហើយបើធ្វើឱ្យអស្ចារ្យដូចទស្សនិកជនចង់បាននោះលោកមិនអាចធ្វើបានទេ។
ម្ចាស់ពានរង្វាន់រូបនេះបញ្ជាក់ថា៖”មានបងប្អូនខ្លះគាត់រិះគន់ខ្ញុំ គាត់ថាសាមញ្ញម្ល៉េះ ទាំងការស្លៀកពាក់ ទាំងការទៅណាមកណា ទាំងការនិយាយស្ដី ទាំងអត្តចរិត មិចក៏សាមញ្ញម្ល៉េះ មិចក៏មិនធ្វើឱ្យសមជាម្ចាស់ពាន។ សម្រាប់ខ្ញុំបងប្អូន ម្ចាស់ពាន បងប្អូនត្រូវយល់ពាក្យថាម្ចាស់ពានឱ្យបានសិន ម្ចាស់ពានកើតមកពីណា កើតមកពីខ្លួនឯង?”។
លោកបានបញ្ជាក់បន្ថែមទៀតថា៖” អត់មែនទេណាបងប្អូន មិនមែនទេ ខ្លួនឯងតែមួយភាគទេបងប្អូនអើយ កើតមកពីក្រុមហ៊ុន ក្រុមហ៊ុនអ្នកបង្កើតកម្មវិធីមកឱ្យយើង ហើយបងប្អូនមហាជនរបស់យើងក្នុងប្រទេស ដែលគាត់ជ្រើសរើសយកយើងជាម្ចាស់ពាន ហើយឱ្យយើងទៅអស្ចារ្យយ៉ាងមិច ឱ្យយើងទៅផ្លាស់ប្ដូរចរិតជាម្ចាស់ពានរបៀបមិច។ បងប្អូនកុំថាឱ្យខ្ញុំសាមញ្ញអីបងប្អូន ខ្ញុំមានថ្ងៃនេះ ដោយសារបងប្អូនទាំងអស់គ្នាទេ បងប្អូនឱ្យខ្ញុំទៅធ្វើអស្ចារ្យ ខ្ញុំធ្វើអត់ចេញទេបងប្អូន រអៀសចិត្តណាស់បងប្អូន បើគ្មានបងប្អូន គ្មានកម្មវិធីទេ ខ្ញុំគ្មានថ្ងៃនេះទេ”។
យ៉ាងណាក៏ដោយបើទោះជាមានមតិមួយចំនួនរិះគន់ និងចង់សើចចំអកឱ្យលោកក្ដី ក៏ប៉ុន្តែនៅតែមានមហាជន តែរូបលោកស្រលាញ់ចូលចិត្តការតុបតែងខ្លួនបែបនេះ និងចូលចិត្តអត្តចរិកឫកពារដ៏ល្អពេញដោយគុណធម៌ និង រូបសម្បត្តិគួរស្រឡាញ់ ស្នាមញញឹមស្រស់មានមន្តស្នេហ៍របស់លោក ដែលធ្វើឱ្យអ្នកគាំទ្រជាច្រើន ជាពិសេសនារីៗលង់ស្រឡាញ់រូបលោកផងដែរ។
លើសពីនេះ លីម តិចម៉េង តែងឆក់ចំណាប់អារម្មណ៍មហាជនអ្នកគាំទ្រឱ្យចូលចិត្ត និង សរសើរចំពោះភាពសាមញ្ញៗរបស់លោក ទាំងការស្លៀកពាក់ ទាំងការនិយាយស្ដី និង ធ្វើឱ្យគេសើចសប្បាយគ្រប់គ្នាតាមរយៈកាយវិការកំប្លែងៗ ស្ទាយប្លែកៗគួរឱ្យស្រឡាញ់របស់លោក។
សូមបញ្ជាក់ថាក្រោយក្លាយជាម្ចាស់ពានរង្វាន់ Cambodian Idol រដូវកាលទី៤ មក លឹម តិចម៉េច បានចេញបទចម្រៀងចំនួន២បទ កំពុងទទួលការចាប់អារម្មណ៍ខ្លាំងពីទស្សនិកជន ជាពិសេសបទ “អរគុណ Fan “ ដែលក្លាយជាបទចម្រៀងកំពុងពេញនិយមើបណ្ដាញសង្គម Facebook និង Tik Tok ហើយថ្មីៗខាងមុខនេះលោកក៏ត្រៀមចេញចម្រៀងជាច្រើនបទថែមទៀតផងដែរដើម្បីកំដរអារម្មណ៍ទស្សនិកជន៕