ក្រុមហ៊ុន Sastra Film ដែលមានអ្នក ប៊ុន ចាន់និមល ជាម្ចាស់ បានចេញសេចក្ដីបំភ្លឺមួយរបស់ខ្លួន តាមរយៈបណ្ដាញសង្គម ក្រោយពីមានអ្នករិះគន់ជាខ្លាំងការផលិតស្នាដៃរឿង”ស្នេហា ល្ងង់+ល្ងង់” គឺប្រៀបដូចជារឿងអាសអាភាសរបស់ បរទេស។
យ៉ាងណាក៏ដោយក្នុងសេចក្ដីបំភ្លឺរបស់ខ្លួន Satra Film បានព្រមាននឹងចាត់វិធានការផ្លូវច្បាប់លើអ្នកចែកចាយ ដែលកំពុងចែកចាយបន្តដោយគ្មានការអនុញ្ញាត។ ក្នុងក្រុមហ៊ុនបានសរសើរអ្នកដឹកនាំរឿងនេះថាជាអ្នកដឹកនាំដ៏ឆ្នើមមួយរូបប្រចាំក្រុមហ៊ុន ដែលអ្នកដឹកនាំខាងលើបានផលិតស្នាដៃឱ្យក្រុមហ៊ុនជាង ១០០មកហើយ។
នៅក្នុងសេចក្ដីបំភ្លឺរបស់ក្រុម Sastra Film នៅតែមិនទទួលស្គាល់រឿងនេះជារឿងបែប អាសអាភាសដូចការចោទ និងរិះគន់ពីទស្សនិកជននោះទេ។ ក្រុមហ៊ុននៅតែប្រកាន់ជំហរថាជារឿងបែបអប់រំ ដែលដកស្រង់ចេញពីរឿងពិតមួយនៅក្នុងសង្គម ហើយវីដេអូត្រូវបានគេចែកចាយជាបន្តបន្ទាប់លើបណ្ដាញសង្គម Facebook និង TikTok មានការកាត់ប្លង់ កែប្រែប្លង់ខុសពីទ្រង់ទ្រាយដើម និងមានការបញ្ចេញបញ្ចូលសំឡេងជាដើម។
ក្រុមហ៊ុនបានបដិសេធន៍ថា ខ្លួនគ្មានចេតនាធ្វើរឿងនេះដើម្បីពង្វក់សង្គម ធ្វើឱ្យប៉ះពាល់ដល់វប្បធម៌ ឬមួយចង់ជាន់ពន្លិចវប្បធម៌របស់ខ្មែរនោះទេ។ ម្យ៉ាងទៀតរឿង”ស្នេហា ល្ងង់+ល្ងង់” ខាងលើគឺមានចាក់បញ្ចាំងតែនៅលើ App របស់ Sastra Film តែប៉ុណ្ណោះ។
យ៉ាងណាក៏ដោយការផុសបកស្រាយរបស់ Sastra Film លើផេករបស់ខ្លួនបានមួយរយៈខ្លី ក៏លុបចោលសេចក្ដីបំភ្លឺនេះវិញ ដោយគ្មានមូលហេតុ ក្រោយពីមានអ្នកយកទៅចែកចាយបន្ត ហើយព្រមទាំងរិះគន់ថែមទៀតលើការស្រាយបំភ្លឺក្នុងលិខិតមួយនេះ៕