អតីតតារាកំប្លែង និងបច្ចុប្បន្នជាតារាចម្រៀងប្រុសឈានមុខមួយរូបរបស់ផលិតកម្ម សាន់ដេ ធ្លាប់ព្រលយពាក្យសម្ដីបែបលេងសើចរបស់ខ្លួននាពេលកន្លងទៅថា មានបំណងចង់ក្លាយជាឧកញ៉ាមួយរូបនាពេលខាងមុខ។
យ៉ាងណាបំណងប្រាថ្នារបស់តារាចម្រៀងវ័យក្មេងរូបនេះអាចក្លាយជាការពិតបន្ទាប់ពីលោកទើបតែ ត្រូវបានព្រះមហាក្សត្រប្រោសព្រះរាជទានគ្រឿងឥស្សរិយយសមួយគ្រឿងថ្នាក់ ធិបឌិន្ទ។
យោងតាមព្រះរាជក្រឹត្យដែលចេញកាលពីថ្ងៃទី១២ ខែមករាឆ្នាំ២០២៣ មានគឡាយព្រះហត្ថលេខាដោយព្រះមហាក្សត្រនៃព្រះរាជាណាចក្រកម្ពុជាសម្ដេចព្រះបរមនាថ នរោត្តម សីហមុនី សន្លឹកទីពីរបានបង្ហាញឱ្យឃើញថាឈ្មោះ សុខ មេសា ហៅនាយ ចឺម ទទួលបានគ្រឿងឥស្សរិយយសថ្នាក់ធិបឌិន្ទមួយគ្រឿង។
បើត្រឹមតែឈ្មោះនោះសាធារណជននោះមិនអាចសន្និដ្ឋានថាឈ្មោះ សុខ មេសា នេះគឺជាតារាចម្រៀងនាយចឺមនោះឡើយ ព្រោះអ្នកដែលមានឈ្មោះនិងនាមត្រកូលដូចគ្នាក៏មានច្រើនដែរ។ ប៉ុន្តែគេអាចប្រាកដចិត្តថាឈ្មោះ សុខ មេសា ដែលទទួលបានគ្រឿងឥស្សរិយយសគឺនាយចឺម តារាមួយចំនួនបានជូរពរ ដោយភ្ជាប់ជាមួយរូបភាពរបស់លោក និងព្រះរាជក្រឹត្យចេញដោយព្រះមហាក្សត្រ។
ក្រៅតែពីតារាមួយចំនួន មហាជនជាច្រើនក៏បានជូនពរ និងសាទរដល់តារាចម្រៀងរូបនេះផងដែរ ក្រោយត្រូវបានព្រះមហាក្សត្រប្រោសព្រះរាជទានគ្រឿងឥស្សរិយយសថ្នាក់ ធិបឌិន្ទ។
ប្រសិនបើបំណងប្រាថ្នារបស់នាយ ចឺម ដូចអ្វីដែលលោកប៉ងប្រាថ្នាមែននោះតារាចម្រៀងរូបនេះអាចនឹងដើរតាមដានជើងរៀមច្បង ព្រាប សុវត្ថិ និងខេមរៈ សីរីមន្ត ស្ថិតក្នុងចំណោមសិល្បករចម្រៀងល្បីឈ្មោះមានងារជាឧកញ៉ា៕