កម្មវិធីថ្មីសន្លាង «សាកថ្មជីវិត» នឹងចាប់ផ្តើមចាក់ផ្សាយនៅលើកញ្ចក់ទូរទស្សន៍ ភីអិនអិន នៅរាត្រីថ្ងៃសុក្រ ទី២០ មករា ឆ្នាំ ២០២៣ ស្អែកនេះ តទៅ ដោយមានកំពូលតារាសម្តែងប្រុសរូបសង្ហាលោក ខាត់ វ៉ៃហាំង ជាអ្នកដឹកនាំកម្មវិធីនេះដោយផ្ទាល់។
ដោយសារតែបានស្គាល់នូវកន្លែងទេសចរណ៍ធម្មជាតិជាច្រើនកន្លែងនៅក្នុងប្រទេស ព្រមទាំងចង់បង្ហាញកន្លែងកំសាន្តផ្សេងៗដល់អ្នកគាំទ្រ ទើបលោក ខាត់ វ៉ៃហាំង បានបង្កើតជាកម្មវិធី«សាកថ្មជីវិត» នេះឡើង ដើម្បីជាចំណីចក្ខុដល់ហ្វេនៗជាទីស្រលាញ់របស់លោក បន្ទាប់ពីបានបំពេញការងារនៅក្នុងសិល្បៈអស់រយៈពេលជាច្រើនឆ្នាំ។
កម្មវិធី «សាកថ្មជីវិត» ជាកម្មវិធីដែលបង្ហាញពីកន្លែងទេសចរណ៍ធម្មជាតិ ប្រាសាទបុរាណ និងទីកន្លែងជាច្រើនទៀតនៅក្នុងព្រះរាជណាចក្រកម្ពុជា ដែលទស្សនិកជនមិនទាន់ស្គាល់ ឬស្គាល់រួចមកហើយ ដោយកំពូលតារាសម្តែងលោក ខាត់ វ៉ៃហាំង ជាអ្នកផលិតផង និងជាអ្នកដឹកនាំកម្មវិធី ព្រមទាំងជាមគ្គុទេសក៍ក្នុងកម្មវិធីនេះផងដែរ។
កម្មវិធីដំណើរកម្សាន្ត «សាកថ្មជីវិត» នាថ្ងៃសុក្រទី២០ មករា ២០២៣ ស្អែកនេះ លោក វ៉ៃ ហាំង នឹងសូមនាំប្រិយមិត្តទៅកាន់ រមណីយដ្ឋាននានាក្នុងខេត្តកំពត និងខេត្តកែប។ » ទំនប់ទឹក ៧ មករា (តាមបណ្តោយផ្លូវជាតិលេខ៣) » ភ្នំ កំពង់ត្រាច (ឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត) » ស្ពានចាស់ (ទីរួមខេត្តកំពត) » កោះពោធិ៍ (ភូមិកែប សង្កាត់កែប ក្រុងកែប កែប)។
គួរបញ្ជាក់ដែរថា លោក វ៉ៃហាំង បានសហការណ៍ជាមួយស្ថានីយទូរទស្សន៍ ភីអិនអិន និងក្រសួងទេសចរណ៍ ក្នុងការបង្កើតកម្មវិធី «សាកថ្មជីវិត» ។ កន្លែងទេសចរណ៍ក្នុងស្រុក ណាខ្លះដែលត្រៀមបង្ហាញជូនទស្សនា ដោយលោក វ៉ៃហាំង? សូមកុំភ្លេចរងចាំទស្សនាកម្មវិធី «សាកថ្មជីវិត» នៅលើកញ្ចក់ទូរទស្សន៍ ភីអិនអិន វេលាម៉ោង ៨ យប់ ដល់ ម៉ោង ៩យប់ នៅរៀងរាល់ថ្ងៃសុក្រ៕