ស្តែងពីភាពច្រណែនឈ្នានីស បង្កើតអោយមានការបែកបាក់រវាងមិត្តភក្តិទាំងបី ផ្លាស់ប្តូរពីការស្រលាញ់រាប់អានដោយភាពស្មោះត្រង់ ទៅជាភាពលោភលន់ស្អប់ខ្ពើម ចង់យកឈ្នះបណ្តាលអោយ សន្យា និង ចាន់ធី ក្លាយជាសត្រូវនឹងគ្នា ចំណែកឯ លី ថាវ៉ាត់ បែកបាក់ស្នេហាជាមួយ ចាន់ធី ព្រោះភាពក្រីក្រ មិនអាចផ្តល់ជីវភាពល្អប្រសើរមួយដល់នាងបាន។
ភាពយន្តភាគខ្មែរថ្មីសន្លាងរឿង «សង្គ្រាមមហិច្ឆតា» នឹងត្រៀមចាក់បញ្ចាំងនៅលើកញ្ចក់ទូរទស្សន៍ ភីអិនអិន ឆាប់ៗនេះ ដោយដំណើររឿងបង្ហាញពីស្នេហាមនោសញ្ចេតនា ភាពលោភលន់ ការចង់ឈ្នះ ចង់ល្បី និងមានជីវភាពល្អប្រសើរ មានមហិច្ឆតាតែមិនខំប្រឹងប្រែងតស៊ូ ដើម្បីបំពេញតម្រូវការ បែរជាជ្រើសយកវិធីលេងល្បិច ចុងក្រោយបានត្រឹមតែបរាជ័យ និងបាត់បង់អ្វីៗគ្រប់យ៉ាងដោយដៃរបស់ខ្លួនផ្ទាល់។
សន្យា ជាក្មេងស្រីម្នាក់ដែលមានចិត្តល្អ ចេះជួយយកអាសាមនុស្សជុំវិញខ្លួន ដោយមិនប្រកាន់ មនុស្សគ្រប់គ្នាស្រលាញ់រាប់អាន និងតាមជួយនាងគ្រប់ពេលរហូតបានក្លាយជាតារាចម្រៀងល្បីម្នាក់ លើកលែងតែមិត្តសម្លាញ់ដែលមានឈ្មោះថា ចាន់ធី ដែលតែងតែតាមច្រណែន និងរកវិធីធ្វើបាបនាងគ្រប់ពេល តែចុងក្រោយ សន្យា នៅតែលើកលែងទោសអោយ ចាន់ធី ដដែលដើម្បីកសាងជីវិតថ្មីម្តងទៀត។
ចាន់ធី មានស្ថានភាពគ្រួសារលំបាកដោយសារមានម្តាយជាមនុស្សញៀនល្បែង និងប្អូនប្រុសដែលចូលចិត្តបង្ករបញ្ហាជានិច្ច ទើបធ្វើអោយនាងសម្រេចចិត្តយកខ្លួនទៅប្តូរជាមួយអ្នកមាន ដើម្បីបានលុយមកជួយគ្រួសារ បោះបង់មនុស្សជាទីស្រលាញ់។ ប៉ុន្តែក្រោយមក ដោយចិត្តលោភលន់ច្រណែននឹង សន្យា ទើបនាងហ៊ានលះបង់គ្រប់យ៉ាង ដោយបន្តយកខ្លួនប្រាណប្តូរជាមួយភាពល្បីល្បាញក្នុងវិថីសិល្បៈ។
លី ថាវ៉ាត់ ជាមនុស្សប្រុសដែលមានសមត្ថភាពខាងសិល្បៈ ខំតស៊ូរកប្រាក់ ដើម្បីជួយដល់គ្រួសារ ចាន់ធី ដែលជាសង្សារ តែចុងក្រោយនៅតែបែកបាក់ ទើបធ្វើអោយ ថាវ៉ាត់ មានភាពស្និតស្នាលជាមួយ សន្យា នឹងមានអារម្មណ៍ល្អលើគ្នាទៅវិញទៅមកក្លាយជាស្នេហា និងបង្កើតបានក្រុមចម្រៀងជាមួយគ្នាយ៉ាងជោគជ័យ។
ការបែកបាក់មិត្តភាពរបស់មិត្តភក្តិទាំងបីរវាង សន្យា, ចាន់ធី និង លី ថាវ៉ាត់ កើតឡើងមកពីមហិច្ឆិតា និងការលោភលន់របស់ ចាន់ធី ដែលតែងតែកើតមានការច្រណែនទៅលើ សន្យា ពេលនាងទទួលបានឳកាសការងារល្អជាងខ្លួន តើអាចនឹងត្រឡប់មកធ្វើជាសម្លាញ់នឹងគ្នាវិញបានទេ? សូមកុំភ្លេចរងចាំទស្សនាក្នុងភាពយន្តភាគខ្មែររឿង«សង្គ្រាមមហិច្ឆតា» នឹងផ្សាយជូនទស្សនាចាប់ពីថ្ងៃទី ០៩ ខែ មីនា ឆ្នាំ ២០២៣ វេលាម៉ោង ៧ យប់តទៅ នៅលើកញ្ចក់ទូរទស្សន៍ ភីអិនអិន៕