វត្តមានខ្សែភាពយន្តភាគខ្មែរថ្មី របស់ស្ថានីយទូរទស្សន៍ភីអិនអិន គឺរឿង “រងើកភ្លើងអនឡាញ” នឹងចូលខ្លួនមកបម្រើអារម្មណ៍ទស្សនិកជននាយប់ថ្ងៃទី ២៣ ខែមីនា ឆ្នាំ២០២៣ តទៅបន្ទាប់ពីរឿង “លួចស្នេហ៍គូដណ្តឹង”ត្រូវបានបញ្ចប់ទៅ។
“ រងើកភ្លើងអនឡាញ” គឺជាចំណងដៃថ្មីមួយទៀត ដែលការមកដល់លើកនេះ គឺកាន់តែធ្វើឲ្យអ្នកទស្សនាជក់ចិត្ត នឹងសាច់រឿងថ្មី ជាពិសេស ក្នុងនោះ ក៏មានការផ្លាស់ប្តូរតួអង្គសម្តែងថ្មីផងដែរ។
ជាមួយនឹងវត្តមានតួអង្គសម្តែងវ័យក្មេងជាច្រើនដួង ដែលទស្សនិកជន ក៏ដូចជា ហ្វេនៗភីអិនអិន បានស្គាល់រួចមកហើយ តាមរយៈខ្សែភាពយន្តភាគមុនៗ។
ចំពោះវត្តមានតួឯក តារាសម្តែងប្រុស ស្រី គឺ កញ្ញា ឈិន មុន្នីនាថ និងលោក ប្រុស ខួច ដែលជាដៃគូសម្តែងថ្មី ក្នុងសាច់រឿងថ្មីផងដែរ។
ក្នុងសាច់រឿងនេះដែរ កញ្ញា មុន្នីនាថ សម្តែងជាតួអង្គ ម៉ានូ រីឯ ប្រុស ខួច សម្តែងជា តួអង្គ ថារ៉ាក់ ដែលពួកគេទាំងពីរជាតួអង្គ ប្រជែង ឌីដងពាក្យសម្តី ចាក់ទឹកមិនលេច ម្នាក់ពូកែឌឺ និងម្នាក់ទៀត ចិត្តពូកែខឹង និងមានការចូលរួមសម្តែងពីតារាល្បីជើងចាស់ វ័យក្មេងផ្សេងទៀត រួមមាន ដូចជា អ្នកនាង ផាន ផាត់ណា ( តួអង្គ វិជ្ជរ៉ា) , លោក ចន សាក ( ណារ៉ុង) , លោក ប្រាក់ ផាខន( សីតធី), លោក សាវិន ហ្វីលីព( វ៉ាន់) , លោក យុន រិទ្ធីយ៉ាន( ដារ៉ូ) , អ្នកនាង ព្រីម មន្ថា(ដានី) និងវត្តមានតារាៗជាច្រើនរូបទៀត។
យ៉ាងណាមិញ សម្រាប់វត្តមានខ្សែភាពយន្តភាគខ្មែរខាងលើ នឹងបង្ហាញពីសាច់រឿងនៃជីវិតក្នុងយុគសម័យទំនើបនាពេលបច្ចុប្បន្ន និងថែមទាំងឆ្លុះបញ្ចាំងពីជីវិតនៃការតស៊ូរបស់តួអង្គក្មេងស្រីម្នាក់គឺ នាង ម៉ានូ ។ មិនតែប៉ុណ្ណោះ អ្នកទស្សនានឹងទទួលយកនូវបទពិសោធន៍រសជាតិជីវិតគ្រួសារ ប្តីប្រពន្ធ និងភាពកក់ក្កៅ ដែលម្តាយឪពុកគួរផ្តល់ទៅឲ្យកូនៗ។ មួយវិញទៀត ក៏មានការលាយបញ្ចូលនូវ ឈុតឆាកកំប្លុកកំប្លែង ផ្លែផ្កា ស្នេហា កម្សត់ និងការអប់រំទូន្មាន រួមទាំងចំណេះដឹងល្អៗក្នុងមេរៀនជីវិតថែមទៀតផង។
ចង់ដឹងថា តើសាច់រឿងខាងលើ នឹងបកស្រាយអំពីអត្ថន័យនៃស្នេហា ជីវិត និងការតស៊ូរបស់តួអង្គនីមួយៗបែបណាខ្លះ សូមកុំភ្លេចរង់ចាំទស្សនានៅក្នុងខ្សែភាពយន្តភាគខ្មែរ រឿង រងើកភ្លើងអនឡាញ នៅលើកញ្ចក់ទូរស្សន៍ភីអិនអិន ចាប់ពីថ្ងៃទី ២៣ ខែ មីនា ឆ្នាំ ២០២៣ ពីថ្ងៃចន្ទ ដល់ ថ្ងៃ ព្រហស្បតិ៍ វេលាម៉ោង ០៨ យប់តទៅ៕
សូមទស្សនាវីដេអូខាងក្រោម៖