ជាសាច់រឿងថ្មី រសជាតិថ្មីភាពយន្តភាគថៃ «ឃាតកកំពូលស្នេហ៍» បង្ហាញពីភាពអាថ៌កំបាំងនៃនារីឃាតកម្នាក់ ជាមនុស្សដែលគ្មានសាច់ញាតិ ត្រូវបានលោកអ៊ំប្រុសម្នាក់យកមកចិញ្ចឹម បន្ទាប់ពីឪពុកម្តាយត្រូវឃាតកសម្លាប់។ រស់នៅជាមួយឧក្រិដ្ឋជនតាំងពីតូច ដោយភាពអត់ឃ្លាន ពេលហ្វឹកហ្វាត់មិនបានសម្រេច ទើបធ្វើអោយ មូន ក្លាយជាមនុស្សស្រីម្នាក់ដែលគ្មានមនោសញ្ចេតនា។
មូន គឺជាមនុស្សស្រីស្អាត ប៉ុន្តែមានភាពស្ងប់ស្ងាត់ មិននិយាយច្រើន ម៉ឺងម៉ាត់ អត់ធ្មត់ ពូកែក្បាច់គុនគ្រប់ស្នៀត ព្រោះជាឃាតកដៃឯក មិនធ្លាប់បរាជ័យទៅលើការងារក្នុងនាមជាឧក្រិដ្ឋជនម្នាក់។ ប៉ុន្តែថ្ងៃមួយបានបរាជ័យទៅលើការងារជាលើកដំបូង ទើបនាងត្រូវបញ្ជាអោយសម្លាប់បំបិទមាត់ តែក៏ត្រូវអ៊ំប្រុសដែលចិញ្ចឹមនាងតាំងពីតូចស្ម័គ្រស្លាប់ជំនួស មូន ក៏ត្រូវបានដោះលែង។ មុនពេលចេញពីជម្រកដែលរស់នៅតាំងពីតូច មូន ក៏បានដឹងនូវអាថ៌កំបាំងពីមនុស្សដែលបានសម្លាប់ឪពុកម្តាយរបស់ខ្លួន នោះគឺជា ចៅហ្វាយដែលនាងគោរពមករហូត ទើបនាងព្យាយាមយកភស្តុតាងមកបង្ហាញដល់ប៉ូលីស តែក៏ត្រូវពួកឧក្រិដ្ឋជនតាមសម្លាប់រហូតដល់ធ្លាក់ពីលើជ្រោះបាត់ការចងចាំ មូន ក៏បានក្លាយជាមនុស្សថ្មី ពូកែនិយាយ មានភាពស្រស់ស្រាយ ជីវិតថ្មី ដែលបានមកពីការជួយសង្គ្រោះរបស់លោក រ៉ុត។
រ៉ុត គឺជាបុរសសង្ហាមានមន្តស្នេហ៍មនុស្សស្រីជុំវិញខ្លួនស្រលាញ់ចង់បាន ព្រោះតែភាពសង្ហា និងចិត្តល្អ ជាមនុស្សមានភាពស្មោះត្រង់ មានតួនាទីជាប្រធានសមាគមន៍ការពារសត្វព្រៃ។ បន្ទាប់ពីបានរស់នៅក្រោមដំបូលផ្ទះជាមួយ មូន ដែលជាមនុស្សខ្លួនបានជួយជីវិត រ៉ុត ក៏បានសង្ស័យថានាង នៅក្នុងក្រុមឧក្រិដ្ឋជនដែរ ប៉ុន្តែ រ៉ុត នៅតែឲ្យនាងរស់នៅក្នុងផ្ទះជាមួយ ថែមទាំងមើលថែបានយ៉ាងល្អ។ ការរស់នៅជាមួយគ្នាយូរៗ ធ្វើអោយអ្នកទាំងពីរមានចិត្តស្រលាញ់ទៅលើគ្នាទៅវិញទៅមក។
រឿងដែលនឹកស្មានមិនដល់នោះ ចៅហ្វាយដែល មូន ធ្វើការជាមួយ គឺជាឪពុកបង្កើតរបស់ រ៉ុត។ ភាពខ្មៅងងឹតដែលឪពុករបស់ រ៉ុត បានធ្វើមកលើគ្រួសាររបស់ មូន គឺមិនអាចលើកលែងបាននោះទេ។ អាចទេដែល មូន លើកលែងនូវកំហុសរបស់អតីតចៅហ្វាយ ដោយលាងកំហុសទាំងនោះ ដោយភាពចិត្តល្អ និងស្នេហាស្មោះត្រង់របស់ រ៉ុត ជាអ្នកសាងជំនួស?
ចង់ជ្រាបកាន់តែច្បាស់ សូមរងចាំទស្សនានៅក្នុងភាពយន្តភាគថៃថ្មី «ឃាតករកំពូលស្នេហ៍» មានផ្សាយជូនទស្សនាចាប់ពីថ្ងៃ ពុធ ទី ១២ ខែ មេសា នេះតទៅ នៅវេលាម៉ោង ១១ ព្រឹកដល់ម៉ោង ១២ ថ្ងៃត្រង់នៅលើកញ្ចក់ទូរទស្សន៍ ភីអិនអិន៕