«ដើម្បីអូន» ជាខ្សែសាច់រឿងដែលបង្ហាញពីស្នេហាគូស្នេហ៍មួយគូ បានជួបគ្នាហើយក៏ប្រែជាបែកបាក់គ្នាទៅវិញដោយជួបនូវរឿងនឹកស្មានមិនដល់។ សៃឃីម គឺជាកូនស្រីអភិជនមួយរូប មានឪពុកជាអ្នកជំនួញដ៏ល្បីល្បាញក្នុងស្រុក។ ថ្ងៃមួយ នាងបានជួបនឹង ខ្លា ដែលជាកូនអ្នកក្រីក្រ មានការងារធ្វើត្រឹមតែជាកូនចៅគេ។ សៃឃីម បានជួប ខ្លា ហើយក៏មានចិត្តអោយគ្នាទៅវិញទៅមក តែព្រោះតែឋានៈគ្រួសារដូចមេឃ និងដី ក៏បណ្តាលអោយអ្នកទាំងពីរត្រូវបែកគ្នា។
ខ្លា ធ្វើការងារជាជាងជួសជុលរថយន្តនៅយានដ្ឋានមួយ មានជីវភាពក្រីក្រ ប៉ុន្តែចិត្តល្អ ចេះជួយអ្នកដែលមានភាពលំបាកជាងខ្លួន។ ប៉ុន្តែថ្ងៃមួយជីវិតក៏បានផ្លាស់ប្តូរ ក្រោយបានជួបជាមួយមហាសេដ្ឋីទទួលធ្វើជាកូនចិញ្ចឹម ថែមទាំងជាអ្នកស្នងមរតកទៀតផង។ ដោយសារឋានៈល្អនេះហើយ ទើបធ្វើអោយ ខ្លា ត្រឡប់មកវិញ ដើម្បីសងសឹកអ្នកដែលធ្លាប់ធ្វើបាបនឹងជាន់ឈ្លីខ្លួនពីមុនមក ជាពិសេសគ្រួសាររបស់ សៃឃីម។
សៃឃីម ជាមនុស្សស្រីស្លូតត្រង់ ត្រូវបានបង្រៀនយ៉ាងល្អ រស់នៅដូចជាព្រះនាង មិនដែលធ្វើអ្វីពិបាក កិច្ចការដែលនាងធ្វើមានតែការរៀនសូត្រ និងស្តាប់បង្គាប់ឪពុកតាំងពីដឹងក្តី។ ដោយសារជីវភាពល្អ ទើប សៃឃីម ចង់សាកប្រើជីវិតសាមញ្ញ ទើបបណ្តាលអោយបានជួបជាមួយ ខ្លា។ អ្នកទាំងពីរក៏ស្រលាញ់គ្នា ប៉ុន្តែដោយជីវិភាពខុសគ្នាខ្លាំង ត្រូវបានឪពុករបស់ សៃឃីម តាមបំបែករហូតព្រ័ត្រគ្នាអស់រយៈពេលជាច្រើនឆ្នាំ។
ពីរឆ្នាំបានកន្លងផុតទៅ សៃឃីម និង ខ្លា បានជួបគ្នាម្តងទៀត ប៉ុន្តែលើកនេះ ខ្លា ក្លាយជាមនុស្សថ្មីដែលខុសពីមុនដាច់ស្រឡះ នៅក្នុងចិត្តមានតែគំនុំសងសឹក។ ទំនាក់ទំនងរបស់ពួកគេទាំងពីរ ចាប់ផ្តើមកើតឡើងម្តងទៀត ប៉ុន្តែមិនមែនដូចជាកាលពីពីរឆ្នាំមុននោះឡើយ ដោយការចាប់ផ្តើមម្តងនេះ មានទាំងស្នេហាគួបផ្សំជាមួយការសងសឹកដែលមិនចេះចប់។ តើចុងក្រោយ ខ្លា និង សៃឃីម អាចផ្តើមស្នេហាបរិសុទ្ធម្តងទៀតដែរទេ?
សូមកុំភ្លេចរងចាំទស្សនាភាពយន្តភាគថៃថ្មី «ដើម្បីអូន» ដែលមានផ្សាយជូនទស្សនាចាប់ពីថ្ងៃទី ២០ ខែ មេសា ឆ្នាំ ២០២៣ វេលាម៉ោង ៩ យប់តទៅ នៅលើកញ្ចក់ទូរទស្សន៍ ភីអិនអិន៕