ភាពយន្តភាគចិនថ្មី «តំណក់ឈាមអ្នកក្លាហាន» បង្ហាញពីការចង់ក្លាយជាអ្នកទី ១ ក្នុងពិភពគុន ត្រៀមចាក់បញ្ចាំងលើកញ្ចក់ទូរទស្សន៍ ភីអិនអិន ឆាប់ៗនេះ

«តំណក់ឈាមអ្នកក្លាហាន» ជាភាពយន្តភាគចិនថ្មី ត្រៀមចាក់បញ្ចាំងលើកញ្ចក់ទូរទស្សន៍ ភីអិនអិន ក្នុងខែ មេសា នេះ ដោយសាច់រឿងបង្ហាញពីការបង្ហូរឈាមអ្នកប្រយុទ្ធគ្រប់ទិសទី អួតពីភាពខ្លាំងពូកែរៀងៗខ្លួន ធ្វើឲ្យគំនុំសងសឹកមិនចេះចប់ បង្កើតបានជាសង្គ្រាមក្រោមមេឃ ដណ្តើមអំណាចចង់ក្លាយជាស្តេចផែនដីនៃខ្សែរាជវង្សមួយ បងប្អូនកាប់សម្លាប់គ្នា កូនចង់សម្លាប់ម្តាយឪពុក ព្រោះតែអំណាច។ ក្រៅពីនេះ ភាពយន្តថ្មីសន្លាងមួយនេះ ក៏បានបង្ហាញពីមនោសញ្ចេតនាមិត្តភាព ដែលមានភាពស្មោះស្ម័គ្រ មិនបោះបង់ចោលគ្នានៅគ្រាមានអាសន្ន។

ក្នុងដំណើរផ្សងព្រេងរបស់មិត្តភក្តិទាំងបី ស៊ីវស៊ឺ ឡាយ អ៊ូជា និង អ៊ូស៊ីង ជួបគ្នាដោយចៃដន្យពេលជួបគ្រោះថ្នាក់។ ដោយសារភាពស្មោះត្រង់ ទើប អ៊ូស៊ីង រើសយក ស៊ីវស៊ឺ និង ឡាយ អ៊ូជា មករួមដំណើរជាមួយ ដើម្បីសម្រេចគោលដៅដែលបានប៉ងក្នុងការត្រឡប់ទៅសងសឹកជូនឪពុក ដែលបានស្លាប់ទៅអស់រយៈពេលជាច្រើនឆ្នាំ។ អ៊ូស៊ីង គឺជាសង្ឃ ដែលបួសរៀនតាំងពីមានវ័យទើបតែ ៥ ឆ្នាំ ដោយសារមានការតាមសម្លាប់ពីឃាតក ទើបត្រូវព្រោះសង្ឃមួយអង្គយកមកចិញ្ចឹម និងបង្រៀនក្បាច់គុនជាច្រើន រហូតក្លាយទៅជាមនុស្សខ្លាំងពូកែ ទើបមានមនុស្សនៅក្នុងពិភពគុនជាច្រើនចង់បានខ្លួន ដើម្បីរំលាយវិជ្ជាគុនរបស់ អ៊ូស៊ីង។

ស៊ីវស៊ឺ ផ្តើមចេញពីថៅកែផ្ទះសំណាក់មួយកន្លែង បានរួមដំណើរជាមួយ ឡាយ អ៊ូជា ដោយសាតែ ឡាយ អ៊ូជា ជំពាក់លុយខ្លួន ប៉ុន្តែនៅក្នុងចិត្តរបស់ ស៊ីវស៊ឺ ហាក់ដូចជាមានអាថ៌កំបាំងមួយដែលកប់ជ្រៅ មិនចង់បង្ហាញទៅកាន់អ្នកដទៃដឹង ក្នុងដំណើរនេះ ។ ស៊ីវស៊ឺ ជាមនុស្សមិនចេះក្បាច់គុន តែឆ្លាតវៃ អាចដឹងរឿងគ្រប់យ៉ាងនៅក្នុងពិភពគុន ទាំងវត្ថុទិព្ទ និងក្បាច់គុនគ្រប់ក្បាច់ ស៊ីវស៊ឺ អាចបកស្រាយបានយ៉ាងក្បោះក្បាយ ថែមទាំងមានភាពវ័យឆ្លាត ក្នុងការដោះស្រាយបញ្ហាយ៉ាងរលូន និងជាមនុស្សមានមានអំណាច ព្រមទាំងអាថ៌កំបាំង ដែលមនុស្សជុំវិញខ្លួនស្មានមិនដល់។

ឡាយ អ៊ូជា ជាមនុស្សមិនសូវឆ្លាត ប៉ុន្តែខ្លាំងពូកែខាងក្បាច់គុន មានចិត្តអត់ធ្មត់ និងវ័យឆ្លាតក្នុងការហាត់រៀនក្បាច់គុណ ស្មោះត្រង់ មានភាពសប្បាយរីករាយគ្មានទុក្ខកង្វល់ ជួយមិត្តភក្តិដោយមិនខ្លាចបាត់បង់ជីវិត។

ក្រោយមកអ្នកទាំងបីក៏បានបំបែកផ្លូវគ្នា ដោយ អ៊ូស៊ីង ត្រូវត្រឡប់ទៅគ្រប់គ្រងបក្សបិសាចបន្តពីឪពុក ដោយទុកឲ្យ ឡាយ អ៊ូជា និង ស៊ីវស៊ឺ ត្រូវរួមដំណើរជាមួយគ្នាបន្តតែ ២ នាក់។ ទោះបីជាមិនបានរួមដំណើរជាមួយគ្នាបន្តទៀតក៏ដោយ នៅពេលដែលមានបញ្ហា អ្នកទាំងបីក៏ត្រឡប់មកជួយគ្នាទៅវិញទៅមក ហើយចុងក្រោយមនុស្សគ្រប់គ្នាដែលនៅជុំវិញខ្លួន ស៊ីវស៊ឺ ក៏ត្រូវមកតាមការពារជីវិតរបស់ ស៊ីវស៊ឺ តើ ស៊ីវស៊ឺ ជានណា មកពីណា? សូមកុំភ្លេចរងចាំទស្សនាក្នុងភាពយន្តភាគចិន «តំណក់ឈាមអ្នកក្លាហាន» នៅរៀងរាល់ថ្ងៃ ចន្ទ ដល់ថ្ងៃ ព្រហស្បតិ៍ វេលាម៉ោង ១២ ថ្ងៃត្រង់តទៅ នៅលើកញ្ចក់ទូរទស្សន៍ ភីអិនអិន៕

Leave a Reply

Your email address will not be published. Required fields are marked *

Share via
Copy link
Powered by Social Snap