ប្រសិនបើនៅជនបទ ឬទីចំកាត់មាត់ញកកម្រិតវ័យ ៦៧ឆ្នាំដូចជា ផលិតករលោកស្រី ពាន់ ភួងបុប្ផា នឹងដើរធ្វើបុណ្យតាមទីវត្តអារាមនានាបាត់អស់ទៅហើយ។
តែនេះមិនដូច្នោះទេ សម្រាប់ផលិតករល្បីឈ្មោះរូបនេះនៅតែខ្នះខ្នែងខ្លាំងលើវិស័យភាពយន្តដើម្បីជួយជំរុញលើកកម្ពស់វិស័យភាពយន្តខ្មែរឱ្យបោះជំហានទៅមុខកាន់តែខ្លាំង រួមទាំងការស្រលាញ់ខ្លាំងលើវិស័យនេះផងដែរ។
អ្វីដែលទស្សនិកជនមិនគួរឱ្យជឿទោះជាមានវ័យជ្រេបន្តិចមែនតែការផលិតភាពយន្តពីសំណាក់ផលិតករមានប្រភពមកពីខេត្តស្វាយរៀងខាងលើនៅតែទាក់ទាញការចាប់អារម្មណ៍ខ្លាំងពីទស្សនិកជន។ ជាក់ស្ដែងថ្មីៗនេះស្នាដៃថ្មី២របស់អ្នកស្រីដែលកំពុងរះត្រដែតទន្ទឹមគ្នា ដែលធ្វើឱ្យអ្នកទស្សនាមិនគួរឱ្យជឿសម្រាប់ការនិពន្ធ និងដឹងនាំរបស់ផលិតករឆ្នើមរូបនេះ។
ស្នាដៃទី១ ដែលជាខ្សែភាពយន្តភាគដ៏ល្អឯកប្រចាំឆ្នាំគឺេឿងរសជាតអ្នកមានវគ្គ៣” បានសហការផលិតជាមួយស្ថានីយទូរទស្សន៍ PNN គឺបានសម្រិតសម្រាំងជាខ្លាំង ហើយខ្សែភាពយន្តនេះចាយទុនជាងកន្លះលានឯណោះ។ ហើយស្នាដៃទី២ គឺរឿង”ពេលម៉ែចាស់ទៅ” របស់ផលិតកម្ម KongChak Picture ដែលត្រៀមចាក់បញ្ចាំងតាមរោងភាពយន្តនានាចាប់ពីថ្ងៃទី ១៦ ខែមិថុនា ឆ្នាំ២០២២ សប្ដាហ៍ក្រោយនេះតទៅហើយ។
ផលិតករឈរជើងលើវិថីសិល្បៈជាង៣៣ឆ្នាំរូបនេះបានបង្ហាញពីក្ដីរីរាយរបស់ខ្លួនដែលស្នាដៃបានលេចចេញជាបន្តបន្ទាប់រហូតទទួលការគាំទ្រពីទស្សនិកជន។ សម្រាប់រឿង”រសជាតិអ្នកមានវគ្គ៣” គឺជាសាច់រឿងដែលលោកស្រីធ្វើការសិក្សាវិធីសាស្ត្រថ្មី ក្នុងការទាក់ទាញពីមួយភាគទៅមួយភាគពេញដោយបញ្ហា ដែលរំលេចមកចោទ ក៏ដូចជា បានបង្កប់ដំណោះស្រាយ ។
លោកស្រីបានពន្យល់បន្ថែមដែរថា ជីវិតមនុស្សរមែងពឹងផ្អែកលើមាសប្រាក់លុយកាក់លើវិស័យគាំទ្រជាច្រើននៃការរស់នៅ ប៉ុន្តែសុភមង្គលក្នុងគ្រួសារ គឺជាអ្វីមួយលើសពីការដែលប្រាក់អាចសន្យាបាន។
ដោយឡែកសម្រាប់រឿង”ពេលម៉ែចាស់ទៅ” វិញលោកស្រីបានបញ្ជាក់ថា គឺជាស្នាដៃមួយមនុស្សជាទូទៅនឹងទទួលបានដឹងបានលឺគ្រប់គ្នាថាជីវិតចាស់ទៅនឹងទៅជាយ៉ាងណា កាន់តែចាស់ កាន់តែឯកោ ដោយទាមទារឱ្យបុត្រធីតាទាំងឡាយយកចិត្តទុកដាក់ចំពោះគាត់កាន់តែខ្លាំង។ ម្យ៉ាងន័យដ៏សំខាន់មួយទៀតសម្រាប់រឿងនេះគឺលោកស្រីចង់ឱ្យមនុស្សគ្រប់រូបត្រូវធ្វើបុណ្យទាន់ខែភ្លឺ កុំចាំដល់ខែងងឹងចាំធ្វើនោះវានឹងងងឹងឈឹងមិនអាចត្រឡប់មកវិញទេ។
សូមបញ្ជាក់ថាសម្រាប់ស្នាដៃថ្មីទាំងពីរដែលកំពុងរះត្រដែតកំពុងធ្វើឱ្យផលិតករល្បីឈ្មោះរូបនេះពិចារណាចាកចេញពីពិភពសិល្បៈជាថ្មី ជាពិសេសគឺរឿង”ពេលម៉ែចាស់ទៅ”នេះតែម្ដងព្រោះវាត្រូវនឹងបរិបទរបស់លោកស្រីផ្ទាល់។ លោកស្រីធ្លាប់ប្រកាសផ្អាកពីការផលិតភាពយន្តម្ដងរួចមកហើយ តែក្រោយមកបានត្រឡប់មកវិញតែចង់ជួយលើកកម្ពស់វិស័យភាពយន្តខ្មែរឱ្យរីកចម្រើន៕
