អាចនិយាយថាយីអ៊ុនឡើងផ្ទួនៗក៏ថាបានសម្រាប់លោក ណាន វីសារ តែជាបេក្ខភាពលេខធ្លោមួយរូបក្នុងកម្មវិធី Cambodia Idol កាលពីសប្ដាហ៍មុន ដោយមិនត្រឹមតែទាក់ទាញការគាំទ្រពីគណៈកម្មការទាំង៤រូប និងទស្សនិកជនប៉ុណ្ណោះទេ។ បេក្ខជនរូបនេះក៏ត្រូវការគេផ្សារភ្ជាប់ពីទំនាក់ទំនងរវាងលោក និងបវរកញ្ញាចក្រវាលល្បីឈ្មោះកញ្ញា ងិន ម៉ារ៉ាឌី ថែមទៀត។
តាមការឱ្យដឹងពីអ្នកគាំទ្រដែលបាននិយាយថា បេក្ខជន ណាន វីសារ គឺជាបុគ្គលមួយរូបធ្លាប់ជាអ្នកជួយជ្រោមជ្រែងដល់បវរកញ្ញា ងិន ម៉ារ៉ាឌី ពេលចូលប្រកួត Miss Universe Cambodia២០២១ ។ ជាក់ស្តែងនៅលើគណនីហ្វេសប៊ុកWe love Visa Nan បានរៀបរាប់ថា « ទាំងអស់គ្នាមានដឹងទេថា នៅពីក្រោយភាពជោគជ័យរបស់កញ្ញា Ngin Marady – Rosa នៃការឈ្នះម្កុដ Miss Universe Cambodia 2021 ក៏មានការជួយជ្រោមជ្រែងពីបងប្រុស ណាន វិសារ – Nan Visa បេក្ខភាព Cambodia idol រដូវកាលទី៤ផងដែរ»។
ប្រភពបានបញ្ជាក់បន្ថែមដោយខ្លីទៀតថា ដោយគាត់(ណាន វិសារ) តែងតែនៅក្បែរបង ម៉ារ៉ាឌី ជានិច្ច និងជួយរៀបចំខ្លួនក្នុងអំឡុងពេលប្រកួតMUC 2021 ក៏ដូចជាថតរូប និងសកម្មភាពផ្សេងៗ ជូនបង ម៉ារ៉ាឌី ផងដែរ។
មិនត្រឹមតែជាអ្នកចម្រៀងមានទឹកដមសំនៀងពីរោះមួយមុខទេ ណាន វីសារ ក៏ជាតារាម៉ូដែលមួយរូបដ៏លេខធ្លោផងដែរក្នុងក្រុមរបស់ Oliva Kong ដែលជាដើរម៉ូដដ៏ល្បីឈ្មោះមួយរូប។
លោក Oliva Kong បាននិយាយថា ដើមឡើយបេក្ខភាពរូបនេះគឺជាអ្នករៀនដើរម៉ូដជាមួយលោក ហើយបច្ចុប្បន្នក៏កំពុងស្ថិតក្នុងក្រុមជាមួយខ្លួនផងដែរ។ លោកបានបង្ហាពីភាពរីករាយនៅកូនសិស្សម្នាក់មានសមត្ថភាពអាចឡើងប្រកួតប្រជែងបានបែបនេះ។
សូមបញ្ជាក់ថា ណាន វីសារ នឹងត្រូវតតាំងជាមួយបេក្ខភាពផ្សេងទៀតក្នុងកម្មវិធី Cambodian Idol ក្នុងសប្ដាហ៍ក្រោយៗបន្ទាប់ទៀត។ តាមរយៈសមត្ថភាព និងរូបសម្ផស្សទស្សនិកជននៅតែជឿជាក់ថាបេក្ខភាពរូបនេះនឹងបន្តទៅវគ្គបន្ទាប់ទៀតជាមិនខាន៕