ក្នុងផែនការមេរបស់ខ្លួនដើម្បីជំរុញការដឹកជញ្ជូនក្នុងប្រទេសកម្ពុជាកាន់តប្រសើរឡើង និងជួយជំរុញសេដ្ឋកិច្ចកម្ពុជាកាន់តែប្រសើររដ្ឋមន្ត្រីក្រសួងសាធារណការ និងដឹកជញ្ជូនឯកឧត្ដម ស៊ុន ចាន់ថុល បានដាក់ចេញផ្លូវសំខាន់ៗចំនួន៤ដើម្បីស្នើទៅខាងភាគីចិន ដើម្បីជួយសម្របសម្រួលលើរឿងនេះ។
ផ្លូវសំខាន់ៗទាំង៤នោះមានដូចជាគម្រោងសាងសង់ផ្លូវបាត់ដំបង-សៀមរាប, គម្រោងសាងសង់ផ្លូវកំពង់ធំ-កំពង់ឆ្នាំង, គម្រោងសាងសង់ផ្លូវល្បឿនលឿនពីភ្នំពេញ-បាវិតម៉ុកបៃ(ព្រំដែនវៀតណាម), គម្រោងសិក្សាធ្វើទំនើបកម្មផ្លូវដែកកម្ពុជា និងប្រព័ន្ធដឹកជញ្ជូនសាធារណៈ ដូចជាគម្រោងសិក្សារថភ្លើងក្រោមដី ប្រព័ន្ធរថភ្លើងអាកាស(Monorail) និងប្រព័ន្ធរថភ្លើងគ្មានអ្នកបើក(AGT)។
បានទោះជាយ៉ាងណាក៏ដោយរដ្ឋមន្ត្រីរូបនេះចង់ឃើញផ្លូវល្បឿនលឿន ភ្នំពេញ-បាវិត លេចជារូបនេះមុនគេ។ ទាំងនេះគម្រោងសាងសង់ផ្លូវល្បឿនលឿនភ្នំពេញ-បាវិត តភ្ជាប់រវាងកម្ពុជានិងវៀតណាម គម្រោងផ្លូវរថភ្លើងតភ្ជាប់ពីភ្នំពេញ ទៅក្រុងហូជីមិញ ជាគម្រោងដ៏ធំក្រោមគំនិតផ្តួចផ្តើមខ្សែក្រវាត់និងផ្លូវ គម្រោងសិក្សាការដឹកជញ្ជូនផ្លូវទឹកទន្លេបាសាក់ពីភ្នំពេញឆ្ពោះត្រង់ទៅកាន់សមុទ្រកម្ពុជា ដែលអាចផ្ដល់ផលចំណេញយ៉ាងច្រើនកាត់បន្ថយពេលវេលា កាត់បន្ថយតម្លៃដឹកជញ្ជូន និងនីតិវិធីគ្រប់បែបផងដែរ។
ទាក់ទងនឹងជំនួយរបស់ចិនលើវិស័យហេដ្ឋារចនាសម្ព័ន្ធ លោករដ្ឋមន្ត្រីបានសំដែងនូវការស្វាគមន៍ចំពោះជំនួយជាប្រាក់កម្ចីសម្បទាន ការប្រាក់ទាបរបស់ចិន ដែលអនុញ្ញាតឱ្យកម្ពុជាអាចកសាងហេដ្ឋារចនាសម្ព័ន្ធរបស់ខ្លួន ដើម្បីជីវភាពរស់នៅរបស់ប្រជាពលរដ្ឋធូរធារ និងល្អជាងមុន សេដ្ឋកិច្ចជាតិមានការរីកចម្រើន។
ទន្ទឹមនឹងនេះ លោកថាជំនួយទាំងនេះក៏បានចូលរួមចំណែកឱ្យកម្ពុជាក្លាយជាប្រទេសមានចំណូលមធ្យមកម្រិតទាបនៅឆ្នាំ២០៣០ និងចំណូលមធ្យមកម្រិតខ្ពស់នៅឆ្នាំ២០៥០ និងបានបង្ហាញជំនឿយ៉ាងមុតមាំថា មិត្តចិននឹងនៅបន្តផ្ដល់ជំនួយឥតសំណង ក៏ដូចជាប្រាក់កម្ចីការប្រាក់ទាប ដើម្បីអនុវត្តគម្រោងកសាងផ្លូវ ស្ពាន និងប្រព័ន្ធហេដ្ឋារចនាសម្ព័ន្ធផ្សេងទៀត៕
