ជាដំណឹងដ៏រីករាយសម្រាប់ប្រជាកសិករក្នុងខេត្ត បាត់ដំបង និងខេត្តប៉ៃលិន ទីដែលជាផ្លៃមៀន និងតាង៉ែនរបស់ កម្ពុជា នឹងត្រូវ ចិន បើចំហរទីផ្សារដើម្បីនាំចូលទៅប្រទេសគេចាប់ពីខែ សីហា ឆ្្នាំ២០២២ ខាងមុខនេះតទៅហើយ។ នេះបើតាមការបញ្ជាក់ពីលោក សួន ជុំ អនុប្រធានសមាគមមៀនប៉ៃលិន។
លោកបានបញ្ជាក់ថាក្រុមហ៊ុន ជីង គួរ យួង ដែលបានបង្កើតរោងចក្រ និងឡសម្លាប់មេរោគលើផ្លៃមៀន នៅក្នុងខេត្តប៉ៃលិន បានកំណត់ផែនការជាដំណាក់កាល ក្នុងការប្រមូលទិញមៀនប៉ៃលិន ពីកសិករ ពីមួយ ទៅពីរ ទូតុងតឺន័រក្នុងមួយថ្ងៃ សម្រាប់នាំទៅប្រទេសចិន។
ទោះជាបែបបេះក្ដីលោកបានបញ្ជាក់ថា ការបញ្ជាទិញពីសំណាក់ក្រុមហ៊ុន គឺផ្ដោតលើតែការទិញពីកសិករណាដែលបានចុះបញ្ជី និងមានវិញ្ញាបនបត្រទទួលស្គាល់ពីក្រសួងកសិកម្ម រុក្ខាប្រមាញ់ និងនេសាទ តែប៉ុណ្ណោះ។
តាមការវាយតម្លៃរបស់អ្នកជំនាញរូបនេះ មៀន ប៉ៃលិន ដែលត្រូវប្រមូលផលចាប់ពីដើមខែសីហា ខាងមុខនេះអាចនឹងមានតម្លៃចាប់ពី ៣៦០០រៀល ទៅ៤៥០០រៀលក្នុងមួយគីឡូក្រាមចម្លោះពីឆ្នាំ២០២២ទៅឆ្នាំ២០២៣ខាងមុខ។ មៀន និងតាង៉ែន ដែលត្រូវបាន ចិន បញ្ជាទិញនោះនឹងត្រូវវេចខ្ចប់តាមលក្ខៈបច្ចេកទេ និងរក្សាទុកយ៉ាងស្អាត និងមានប្រសិទ្ធភាពដើម្បីធានាថាការនាំចេញគ្មានបញ្ហាចោទឡើង។
ដំណឹងដ៏រីករាយនេះបានធ្វើឱ្យកសិករដែលជាអ្នកដាំមៀន និងតាង៉ែន ក្នុងខេត្ត ប៉ៃលិន និងបាត់ដំបង មានភាពសប្បាយរីករាយជាខ្លាំង ដោយពួកគេបានលើកឡើងថា គឺជាអ្វីដែលពួកគេចង់បានជាយូរមកហើយ។ ក្នុងនោះប្រជាកសិករក៏បានថ្លៃអំណរគុណដល់រាជរដ្ឋាភិបាល ជាពិសេសក្រសួងកសិកម្ម រុក្ខាប្រម៉ាញ់ និងនេសាទ ផ្ទាល់តែម្ដង ដែលបានខ្នះខ្នែងខ្លាំងដើម្បីជួយជំរុញឱ្យមៀនប៉ៃលិន របស់ កម្ពុជាអាចនាំចេញទៅទីផ្សារក្រៅប្រទេសបាន។
សូមបញ្ជាក់ថាបច្ចុប្បន្ននេះ កម្ពុជាមានផ្ទៃដីដាំដុះមៀនប៉ៃលិន(តាង៉ែន) ទូទាំងប្រទេស សរុប ១៣ ៦០៨ហិកតា នៅក្នុងខេត្តចំនួន១៤ ។ ដោយឡែក ខេត្តដែលមានកសិករដាំដុះប្រភេទនេះ ច្រើនជាងគេ គឺខេត្តប៉ៃលិន បាត់ដំបង រតនគិរី និងបន្ទាយមានជ័យ។ ក្នុងចំណោមផ្ទៃដីដាំដុះមៀនប៉ៃលិន ឬតាង៉ែនទាំងនេះ គឺមាន ៦ ៩២៧ហិកតា ដែលកសិករទទួលបានទិន្នផលចំនួន ១១ម៉ឺនតោន នៅក្នុងឆ្នាំ២០២១៕
