ឥណ្ឌា គេចាត់ទុកថាជាប្រទេសមហាយក្សមួយនៅអាស៊ី បានយល់ព្រមលក់ទូកល្បឿនលឿនចំនួន១២ ដែលមានទឹកប្រាក់ ១០០លានដុល្លារ ក្រោមឥណទានយោធាបានផ្តល់អោយវៀតណាមតាំងពីឆ្នាំ២០១៤មកម្ល៉េះ។
ការចុះកិច្ចព្រមព្រៀងនិងការប្រគល់សម្ភារសឹកនេះ កើតឡើងចំពេលឥណ្ឌាបង្កើនវត្តមានកងទ័ពជើងទឹកនៅក្នុងតំបន់ឥណ្ឌូប៉ាស៊ីហ្វិក និងពង្រីកទំនាក់ទំនងយោធាជាមួយអាស៊ីអាគ្នេយ៍។
នៅពិធីប្រគល់កាលពីថ្ងៃព្រហស្បតិ៍ រដ្ឋមន្ត្រីការពារជាតិឥណ្ឌាលោក រ៉ាចណាត់ ស៊ីង បាននិយាយថា« ខ្ញុំមានជំនឿចិត្តថា ពិធីនេះនឹងជាអ្នកជូនដំណឹងទុកមុនអំពីគំរោងកិច្ចសហការយោធាច្រើនទៀតរវាងឥណ្ឌានិងវៀតណាម»។
ប្រទេសទាំងពីរបានចុះហត្ថលេខាលើកិច្ចព្រមព្រៀងឡូជីស្ទិកទៅវិញទៅមកមួយ ដែលនឹងអនុញ្ញាតអោយទាហានរបស់គេអាចប្រើមូលដ្ឋានទ័ពនៃប្រទេសមួយទៀតក្នុងគោលបំណងជួសជុលនិងបន្ថែមគ្រឿងផ្គត់ផ្គង់។
ក្នុងសន្និសីទកាសែតមួយក្រសួងការពារជាតិឥណ្ឌាបានហៅកិច្ចព្រមព្រៀងនេះថាជា«ការបោះជំហានធំមួយឆ្ពោះទៅកាន់ការធ្វើអោយងាយស្រួលនីតិវិធីគាំទ្រឡូជីស្ទិកដែលផ្តល់ផលប្រយោជន៍ទៅវិញទៅមក»។
លោកស៊ីង និងសមភាគីវៀតណាមឧត្តមសេនីយ៍ ផាន វ៉ាន់ យ៉ាង(Phan Van Giang)ក៏បានចុះហត្ថលេខាលើសេចក្តីថ្លែងការណ៍ទស្សនវិស័យរួមមួយស្តីពីភាពជាដៃគូយោធាឥណ្ឌា-វៀតណាមឆ្ពោះទៅឆ្នាំ២០៣០(Joint Vision Statement On India-Vietnam Defence Partnership Towards 2030) ដែលក្រសួងការពារជាតិឥណ្ឌានិយាយថានឹងជំរុញទំហំនិងវិសាលភាពនៃកិច្ចសហប្រតិបត្តិការយោធាដែលមានស្រាប់។
គេថាវៀតណាមក៏កំពុងសម្លឹងរកទិញកាំជ្រួចបណ្តែតលឿនជាងសម្លេងចម្ងាយមធ្យមBrahMos ផលិតនៅឥណ្ឌាផងដែរ។ឥណ្ឌានៅឆ្នាំនេះបានលក់កាំជ្រួចផលិតរួមជាមួយរុស្ស៊ីប្រភេទនេះដល់ហ្វីលីពីន ។
ឥណ្ឌានិងវៀតណាមបាននិងកំពុងពង្រឹងទំនាក់ទំនងយោធារបស់គេ ជំរុញឡើងដោយការព្រួយបារម្ភរួមគ្នាអំពីឥទ្ធិពលកើនឡើងរបស់ប្រទេសចិនក្បែរខាង។ឥណ្ឌាមានជម្លោះព្រំដែនគោកជាមួយចិនដែលកាលពីឆ្នាំ២០២០នាំអោយមានការប៉ះទង្គិចគ្នាដោយកម្លាំងបាយមួយដោយសម្លាប់ទាហានរាប់សិបនាក់នៅភាគីទាំងសងខាង។
សូមបញ្ជាក់ថា ឥណ្ឌានៅឆ្នាំ២០១៦បានប្រគល់ឥណទានដល់វៀតណាមចំនួន៥០០លានដុល្លារផ្សេងទៀតសំរាប់ជួលកម្លាំងជំនាញនិងផលិតសព្វាវុធរួមគ្នាជាមួយឥណ្ឌា។ វៀតណាមក៏អះអាងដែនទឹកជាន់ជាមួយចិននៅក្បែរប្រជុំកោះប៉ារ៉ាសែលនិងប្រឆាំងជំទាស់នឹងសមយុទ្ធយោធាចិននៅក្នុងតំបន់ជម្លោះ៕
